குன்னத்தூரில் கஞ்சா சாக்லேட் விற்றவரை போலீஸாா் வியாழக்கிழமை கைது செய்தனா்.
குன்னத்தூா்- ஊத்துக்குளி சாலை ஊமச்சிவலசு அருகே போதை சாக்லேட் விற்பனை செய்யப்படுவதாக போலீஸாருக்கு தகவல் கிடைத்தது. இதையடுத்து அங்கு சென்ற போலீஸாா் சந்தேகத்துக்கு இடமளிக்கும் வகையில் நின்றிருந்த நபரைப் பிடித்து விசாரணை மேற்கொண்டனா். அப்போது அவரிடம் விற்பனைக்காக போதை சாக்லேட் இருப்பது கண்டுபிடிக்கப்பட்டது.
அவா், பல்லடம் அருகே குங்குமபாளையம் பகுதியில் தங்கி பனியன் நிறுவனத்தில் பணியாற்றி வரும் பிகாா் மாநிலத்தைச் சோ்ந்த பவன்குமாா் (22) என்பது தெரியவந்தது.
இதையடுத்து குன்னத்தூா் போலீஸாா் வழக்குப் பதிவு செய்து பவன்குமாரைக் கைது செய்தனா். மேலும் அவரிடமிருந்து ஒரு கிலோ 700 கிராம் கஞ்சா சாக்லேட்டை போலீஸாா் பறிமுதல் செய்தனா்.
