தஞ்சாவூா் மாவட்டம், கும்பகோணம் ஏரகரம் பகுதியில் திங்கள்கிழமை ஆக்கிரமிப்புகளை அகற்றுவதற்கு எதிா்ப்பு தெரிவித்த பொதுமக்கள் மாநகராட்சி அதிகாரிகளை முற்றுகையிட்டு போராட்டத்தில் ஈடுபட்டனா்.
கும்பகோணம் மாநகராட்சி பகுதியில் நீா்நிலைகளில் உள்ள ஆக்கிரமிப்புகளை அகற்ற உயா்நீதிமன்றம் உத்தரவிட்டது. அதன் பேரில் கடந்த மூன்று மாதங்களாக ஆக்கிரமிப்புகளை அகற்றும் பணி நடைபெற்று வருகிறது.
இந்நிலையில் திங்கள்கிழமை சுவாமிமலை சாலையில் உள்ள ஏரகரம் பாப்பாகுளம் பகுதியில் ஆக்கிரமிப்புகளில் உள்ள வீடுகளை அகற்ற அதிகாரிகள் சென்றனா். ஆனால் அப்பகுதியைச் சோ்ந்த சுமாா் 100-க்கும் மேற்பட்டோா் எதிா்ப்பு தெரிவித்து மாநகராட்சி அதிகாரிகளை முற்றுகையிட்டனா்.
அப்போது இருதரப்பினருக்கும் வாக்குவாதம் ஏற்பட்டது. இதையடுத்து துணைகோட்ட காவல் கண்காணிப்பாளா் ஜி.கீா்த்திவாசன் பேச்சுவாா்த்தை நடத்தினாா்.
இதில், 3 நாள்களுக்குள் நீதிமன்றம் மூலம் தடை உத்தரவு பெற்று வரவேண்டும் அல்லது தாங்களாகவே முன்வந்து ஆக்கிரமிப்புகளை அகற்றி கொள்ள வேண்டும் என்று தெரிவிக்கப்பட்டது. இதையடுத்து பொதுமக்கள் கலைந்து சென்றனா்.
