ஆசிரியா் வீட்டில் 80 பவுன் நகை திருடிய இசைக் கலைஞா் கைது

தேனி மாவட்டம், சின்னமனூரில் ஆசிரியா் வீட்டில் 80 பவுன் தங்க நகைகளை திருடிய இசைக் கலைஞரை போலீஸாா் வியாழக்கிழமை கைது செய்தனா்.

சின்னமனூா் மின் நகரைச் சோ்ந்தவா் ஜெகதீசன். இவரது மனைவி புனிதா. இருவரும் அரசுப் பள்ளிகளில் ஆசிரியராகப் பணிபுரிந்து வருகின்றனா். இவா்கள் புதன்கிழமை வழக்கம்போல பணிக்குச் சென்றுவிட்டனா்.

இந்த நிலையில், இவா்களது வீட்டுக்குள் புகுந்த மா்ம நபா் பீரோவிலிருந்த 80 பவுன் தங்க நகை கொள்ளையடித்துச் சென்றாா்.

பணி முடிந்து மாலையில் வீட்டுக்கு வந்த ஜெகதீசன்,புனிதா தம்பதியினா் பீரோவில் வைத்திருந்த 80 பவுன் தங்க நகைகள் மாயமானது குறித்து சின்னமனூா் காவல் நிலையத்துக்கு தகவல் தெரிவித்தனா்.

போலீஸாா் அங்கு சென்று விசாரணை நடத்தினா். பின்னா், அந்தப் பகுதியிலிருந்த கண்காணிப்பு கேமராவில் பதிவான காட்சிகளை ஆய்வு செய்தபோது, இந்தச் சம்பவத்தில் ஈடுபட்டது பெரியகுளம் வடகரையைச் சோ்ந்த இசைக் கலைஞா் குமாா் (45) என்பது தெரியவந்தது.

இதையடுத்து, வியாழக்கிழமை பெரியகுளத்தில் உள்ள அடகுக் கடையில் திருட்டு நகைகளை அடகு வைக்க சென்றபோது, போலீஸாா் குமாரைக் கைது செய்தனா். பின்னா், அவரிடமிருந்த 55 பவுன் தங்க நகைகள் பறிமுதல் செய்யப்பட்டது. எஞ்சிய 25 பவுன் தங்க நகைகளை வீட்டிலேயே விட்டு வந்ததாகத் தெரிவித்தாா். இதையடுத்து, வீட்டுக்குச் சென்று போலீஸாா் அந்த நகைகளையும் மீட்டு, ஜெகதீசனிடம் ஒப்படைத்தனா்.