`இந்தத் தலைமுறையின் சிறந்த வீரர் கோலி இல்லையா...' - ரிக்கி பாண்டிங்கின் வாதம் என்ன?

கிரிக்கெட் உலகில் இந்தத் தலைமுறையின் சிறந்த பேட்ஸ்மேன் இந்தியாவின் விராட் கோலியா, ஆஸ்திரேலியாவின் ஸ்டீவ் ஸ்மித்தா, இங்கிலாந்தின் ஜோ ரூட்டா அல்லது நியூசிலாந்தின் கேன் வில்லியம்சனா என்கிற விவாதம் முடிவிலியாகவே இருக்கிறது.

இத்தகைய சூழலில், ஆஸ்திரேலிய அணியின் முன்னாள் கேப்டன் ரிக்கி பாண்டிங் அதற்கு முற்றுப்புள்ளி வைக்கும் விதமாக, ஒரு பதிலைத் தந்திருக்கிறார். முன்னதாக, ஆஸ்திரேலியா, இலங்கை அணிகளுக்கெதிரான 2 போட்டிகள் கொண்ட டெஸ்ட் தொடர் இலங்கையின் காலே மைதானத்தில் இன்று தொடங்கியது. பேட் கம்மின்ஸ் இல்லாததால் அணியை வழிநடத்திய ஸ்டீவ் ஸ்மித் (Steve Smith), இன்றைய ஆட்டத்தில் தனது முதல் ரன்னை அடித்து, உலக அளவில் டெஸ்ட் போட்டிகளில் 10,000 ரன்களைக் கடந்த வீரர்களின் பட்டியலில் 15-வது வீரராகத் தனது பெயரைப் பதிவுசெய்தார்.

மேலும், 10,000 டெஸ்ட் ரன்களைக் கடந்த ஆஸ்திரேலிய வீரர்களின் பட்டியலில், ஆலன் பார்டர், ஸ்டீவ் வாக், ரிக்கி பாண்டிங் ஆகியோரைத் தொடர்ந்து நான்காவது இடம் பிடித்தார். இதுமட்டுமல்லாமல், குறைந்த இன்னிங்ஸ்களில் 10,000 டெஸ்ட் ரன்களை அடித்தவர்களின் பட்டியலில் பிரையன் லாரா (195 இன்னிங்ஸ்), சச்சின் டெண்டுல்கர் (195 இன்னிங்ஸ்), குமார் சங்ககாரா (195 இன்னிங்ஸ்), ரிக்கி பாண்டிங் (196 இன்னிங்ஸ்) ஆகியோருக்கு அடுத்த இடத்தில் ஸ்டீவ் ஸ்மித் (205 இன்னிங்ஸ்) வந்திருக்கிறார். இந்தச் சாதனைப் படைத்த அடுத்த சில மணிநேரங்களிலேயே டெஸ்டில் தனது 35-வது சதத்தைப் பதிவுசெய்தார்.

இந்த நிலையில் ரிக்கி பாண்டிங், ``ஸ்டீவ் ஸ்மித் தனது தலைமுறையின் சிறந்த வீரரா என்ற கேள்வியில், அவருக்கு எதிராக வாதிடுவது கடினம். ஒருபக்கம் ஜோ ரூட் இருக்கிறார். கேன் வில்லியம்சனின் ரெக்கார்டும் சிறப்பாக இருக்கிறது. கடந்த சில ஆண்டுகளில் ஜோ ரூட் தன்னை மெருகேற்றியிருக்கிறார். 5 - 6 ஆண்டுகளுக்கு முன்பு கோலி உட்பட நான்கு பேர் பெரிய வீரர்களாக உருவெடுத்தனர். இவர்களில், மற்றவர்கள் அளவுக்கு சதமடிக்காததால் ஜோ ரூட் நான்காவது இடத்தில் இருந்தார்.

ஆனால், கடந்த நான்கு ஆண்டுகளில் ஜோ ரூட் 19 சதங்களை அடித்துள்ளார். எனவே, சிறந்த வீரர் யார் என்று ஆங்கிலேயரிடம் கேட்டால் ஜோ ரூட் என்றும், ஆஸ்திரேலியர்களிடம் கேட்டால் ஸ்டீவ் ஸ்மித் என்றும், நியூசிலாந்தினரிடம் கேட்டால் கேன் வில்லியம்சன் என்றும் கூறுவார்கள். இது சற்று கடினமானது. ஆனாலும், ரெக்கார்ட் அடிப்படையில் ஸ்டீவ் ஸ்மித் செய்ததைப் பார்க்கையில் அவருக்கெதிராக வாதிடுவது கடினம்." என்று கூறியிருக்கிறார்.

இந்த தலைமுறையின் சிறந்த பேட்ஸ்மேன், இந்தியாவின் விராட் கோலியா, ஆஸ்திரேலியாவின் ஸ்டீவ் ஸ்மித்தா, இங்கிலாந்தின் ஜோ ரூட்டா அல்லது நியூசிலாந்தின் கேன் வில்லியம்சனா யார் என்பது பற்றிய உங்களின் கருத்துகளை கமென்ட்டில் பதிவிடவும்.