முன்னாள் பிரதமா் மன்மோகன் சிங்கின் வாழ்க்கையும், பணியும் இந்தியாவின் எதிா்காலத்தை மிகப் பெரிய அளவில் வடிவமைத்ததாக காங்கிரஸ் செயற்குழு தீா்மானத்தில் தெரிவிக்கப்பட்டது.
தில்லியில் உள்ள காங்கிரஸ் தலைமையகத்தில் மன்மோகன் சிங் மறைவுக்கு அஞ்சலி செலுத்த அக்கட்சியின் செயற்குழு வெள்ளிக்கிழமை கூடியது. இந்தக் கூட்டத்தில் அக்கட்சித் தலைவா் மல்லிகாா்ஜுன காா்கே, முன்னாள் தலைவா் சோனியா காந்தி, மக்களவை எம்.பி.க்கள் ராகுல் காந்தி, பிரியங்கா காந்தி, பொதுச் செயலா்கள் ஜெய்ராம் ரமேஷ், கே.சி.வேணுகோபால் உள்ளிட்டோா் பங்கேற்றனா்.
மன்மோகன் சிங் மறைவுக்கு இரங்கல் தெரிவித்து கூட்டத்தில் நிறைவேற்றப்பட்ட தீா்மானத்தில், ‘முன்னாள் பிரதமா் மன்மோகன் சிங்கின் வாழ்க்கையும், பணியும் இந்தியாவின் விதியை மிகப் பெரிய அளவில் வடிவமைத்தது. தனியாா்மயம், அந்நிய முதலீடு ஊக்குவிப்புப் போன்ற கொள்கைகள் மூலம், நாட்டின் வேகமான பொருளாதார வளா்ச்சிக்கு அவா் அடித்தளமிட்டாா்.
பிரதமராக அவரின் தலைமையின் கீழ், பொருளாதாரத்தில் வேகமாக வளரும் நாடுகளில் ஒன்றாக இந்தியா உருவெடுத்தது. இது அவரின் புத்திக் கூா்மைக்கும், தொலைநோக்குப் பாா்வைக்கும் சான்றாகும்.
கடந்த 2008-ஆம் ஆண்டு உலகம் பொருளாதார நெருக்கடியை எதிா்கொண்டது. அப்போது ஏற்பட்ட சவால்களில் இருந்து தனது திட்டங்கள் மூலம், மோசமான பாதிப்புகளில் இருந்து நாட்டை காத்து வழிநடத்திச் சென்றாா்.
திட்டங்கள், சட்டங்கள்...: 100 நாள் வேலைவாய்ப்புத் திட்டம், கல்வி உரிமை, வரலாற்றுச் சிறப்புமிக்க இந்தியா-அமெரிக்கா அணுசக்தி ஒப்பந்தம், தேசிய உணவு பாதுகாப்புச் சட்டம், நிலம் கையகப்படுத்துதல் சட்டம், வேளாண் கடன் தள்ளுபடி மற்றும் கடன் நிவாரண திட்டம், தகவல் அறியும் உரிமைச் சட்டம், பட்டியலினத்தவா், பழங்குடியினா் மற்றும் இதர பிற்படுத்தப்பட்ட வகுப்பினருக்கு 93-ஆவது அரசமைப்புச் சட்டத்திருத்தம் மூலம் சமூக நீதி மேம்படுத்தப்பட்டது உள்ளிட்ட திட்டங்களும், சட்டங்களும் மன்மோகன் சிங் ஆட்சியில் கொண்டுவரப்பட்டன. அவரின் சாதனைகளும், அவா் ஏற்படுத்திய தாக்கமும் இந்திய வரலாற்றில் அழியாமல் நிலைத்திருக்கும்’ என்று தெரிவிக்கப்பட்டது.
