‘உங்களுடன் ஸ்டாலின்’ திட்டம்: ஆட்சியா்களுடன் முதல்வா் ஆலோசனை

அரசின் சேவைகளை இல்லங்களுக்கே கொண்டு சோ்க்கும் ‘உங்களுடன் ஸ்டாலின்’ திட்டத்தைத் தொடங்குவது குறித்து மாவட்ட ஆட்சியா்களுடன் முதல்வா் மு.க.ஸ்டாலின் ஆலோசித்தாா்.

தலைமைச் செயலகத்தில் இருந்து காணொலி வழியாக இந்த ஆலோசனைக் கூட்டம் வெள்ளிக்கிழமை நடைபெற்றது.

இதுகுறித்து தமிழக அரசின் சாா்பில் வெளியிடப்பட்ட செய்திக் குறிப்பு:

மக்கள் அன்றாடம் அணுகும் அரசுத் துறைகளின் சேவைகள், திட்டங்களை அவா்களது இல்லங்களுக்கே சென்று வழங்கும் ‘உங்களுடன் ஸ்டாலின்’ எனும் புதிய முன்னெடுப்பு தொடங்கப்பட உள்ளது. இந்தத் திட்டத்துக்காக ஜூலை 15-ஆம் தேதி முதல் நவம்பா் மாதம் வரை மாநிலம் முழுவதும் 10,000 முகாம்கள் நடைபெறவுள்ளன.

சிதம்பரத்தில் தொடக்கம்: ‘உங்களுடன் ஸ்டாலின்’ திட்டத்துக்கான முதல் முகாமை, சிதம்பரம் நகராட்சியில் முதல்வா் மு.க.ஸ்டாலின், ஜூலை 15-ஆம் தேதி தொடங்கி வைக்கவுள்ளாா். 10,000 முகாம்கள் என்பது இலக்காக இருந்தாலும், திட்டம் தொடங்கப்பட்டு முதல் மாதத்தில் 3,570 முகாம்கள் நடைபெறவுள்ளன. முகாம்கள் நடைபெறும் பகுதிகளில் திட்டம் குறித்த விழிப்புணா்வுப் பணிகள், விண்ணப்பம் மற்றும் தகவல் கையேட்டை வழங்கும் பணியில் 28,370 தன்னாா்வலா்கள் ஈடுபட்டுள்ளனா்.

இந்தப் பணிகளின் முன்னேற்றம் குறித்து தலைமைச் செயலகத்தில் இருந்து காணொலி வழியாக மாவட்ட ஆட்சியா்களுடன் முதல்வா் மு.க.ஸ்டாலின் ஆலோசனை நடத்தினாா். அப்போது, முகாம் தொடா்பான முன்னேற்றப் பணிகள், பொதுமக்களுக்குத் தேவையான குடிநீா் உள்ளிட்ட அடிப்படை வசதிகள் செய்து தரப்படவுள்ளது குறித்து ஆட்சியா்களிடம் கேட்டறிந்தாா்.

அரசின் திட்டங்கள் மற்றும் சேவைகளை பொதுமக்கள் தங்களது இருப்பிடங்களுக்கு அருகிலேயே பெற்றுக்கொள்ள வசதியாக ஏற்பாடுகள் செய்யப்பட்டுள்ளன.

முதல்வா் பயணம்: ‘உங்களுடன் ஸ்டாலின்’ திட்டத்தைத் தொடங்கி வைப்பதற்காக, சென்னையில் இருந்து ஜூலை 14-ஆம் தேதி ராமேசுவரம் விரைவு ரயிலில் கடலூா் செல்கிறாா் முதல்வா் மு.க.ஸ்டாலின். 15-ஆம் தேதி திட்டத்தைத் தொடங்கி வைத்த பிறகு, 2 நாள்கள் மயிலாடுதுறை மாவட்டத்தில் களஆய்வு மேற்கொள்கிறாா். இந்த நிகழ்ச்சிகளை முடித்துக் கொண்டு 16-ஆம் தேதி பிற்பகல் சோழன் விரைவு ரயில் மூலமாக முதல்வா் சென்னை திரும்பவுள்ளாா்.