‘உங்களுடன் ஸ்டாலின்’ திட்ட முகாமில் மகளிா் உரிமைத் தொகைக்கு விண்ணப்பிக்கலாம்

புதிதாக மகளிா் உரிமைத் தொகை பெற ஜூலை 15 முதல் நடைபெற உள்ள ‘உங்களுடன் ஸ்டாலின்’ திட்ட முகாம்களில் மனுக்கள் பெற்று விண்ணப்பிக்கலாம் என்று வேலூா் மாவட்ட ஆட்சியா் வி.ஆா்.சுப்புலட்சுமி தெரிவித்துள்ளாா்.

இதுகுறித்து, அவா் வெளியிட்ட செய்திக்குறிப்பு -

வேலூா் மாவட்டத்தில் நகா்ப்புறப்பகுதிகளில் 71 முகாம்களும், ஊரகப்பகுதிகளில் 140 முகாம்களும் என மொத்தம் 211 முகாம்கள் நடைபெற உள்ளது. இம்முகாம்களில் நகா்ப்புறபகுதிகளில் 13 அரசுத் துறைகளைச் சோ்ந்த 43 சேவைகளும், ஊரகப்பகுதிகளில் 15 துறைகளைச் சோ்ந்த 46 சேவைகளும் வழங்கப்படும்.

அதன்படி, ஜூலை 15-ஆம் தேதி வேலூா் மாநகராட்சி முதலாவது மண்டலம் வாா்டு 1 மற்றும் வாா்டு 3-இல் உள்ள மக்களுக்கு காட்பாடி சென்னாங்குட்டை பெருமாள் கோயிலிலும், குடியாத்தம் நகராட்சி வாா்டு 13 மற்றும் வாா்டு 14-இல் உள்ள மக்களுக்கு ஆா்.எஸ். சாலை பாபு மஹாலிலும், காட்பாடி ஒன்றியம், பொன்னை கிராமத்தில் உள்ளவா்களுக்கு பொன்னை சாமுண்டிஸ்வரி மஹாலிலும், குடியாத்தம் ஒன்றியம் கொண்டசமுத்திரம் ஊராட்சி மக்களுக்கு கொண்டசமுத்திரம் ஆா்.ஜே.டி. மஹாலிலும் போ்ணாம்பட்டு ஒன்றியம், அழிஞ்சிக்குப்பம், ராஜாக்கல் ஆகிய கிராம மக்களுக்கு அழிஞ்சிக்குப்பம் எம்.ஜி.மஹாலிலும், கே.வி.குப்பம் ஒன்றியம், ஆலங்கனேரி, மேல்மாயில் ஆகிய கிராம மக்களுக்கு மேல்மாயில் சித்ரா மஹாலிலும் முகாம்கள் நடைபெற உள்ளது.

ஜூலை 15-ஆம் தேதி நடைபெற உள்ள 6 முகாம்களுக்கான விண்ணப்பங்கள், தகவல் கையேடு திங்கள்கிழமை முதல் வீடுவீடாக வழங்கப்பட்டு வருகிறது. கலைஞா் மகளிா் உரிமை தொகை திட்டத்தில் புதிதாக விண்ணப்பிக்க உள்ள மகளிருக்கு விண்ணப்பங்கள் முகாம் நடைபெறும் நாளில் அந்தந்த முகாமிலேயே தனியாக வழங்கப்படும். முகாம் நடைபெறும் இடத்தில் தேவைப்படும் பயனாளிகள் விண்ணப்பங்களை பெற்று மகளிா் உரிமைத்தொகை பெற விண்ணப்பிக்கலாம் என தெரிவிக்கப்பட்டுள்ளது.