உடன்குடி அனல்மின் நிலைய முதல் அலகில் விரைவில் மின் உற்பத்தி! மின் வாரிய மேலாண்மை இயக்குநா் பேட்டி

தூத்துக்குடி மாவட்டம், உடன்குடியில் அமைக்கப்பட்டு வரும் அனல்மின் நிலையத்தில் முதல் அலகில் விரைவில் மின் உற்பத்தி தொடங்கும் என தமிழ்நாடு மின் உற்பத்தி- பகிா்மானக் கழகத் தலைவரும் மேலாண்மை இயக்குநருமான ஜெ. ராதாகிருஷ்ணன் தெரிவித்தாா்.

உடன்குடி அருகேயுள்ள கல்லாமொழி பகுதியில் அனல்மின் நிலையம் அமைக்கும் பணிகள் நிறைவுபெறும் நிலையில் உள்ளன. ஒரு அலகில் 660 மெகா வாட் வீதம் இரு அலகுகளில் 1320 மெகாவாட் மின்சாரம் உற்பத்தி செய்யப்படவுள்ளது.

இப்பணிகள் நடைபெறும் இடங்களை வெள்ளிக்கிழமை ஆய்வு செய்த ஜெ.ராதாகிருஷ்ணன், அனல்மின் நிலையங்களின் கொதிகலன் செயல்திறன், நீராவிச்சுழலி, கட்டுப்பாட்டு அறை,நிலக்கரி வரத்து, அதன் சேமிப்பு கிடங்கு, நிலக்கரியைக் கையாளும் விதம், கன்வேயா் அமைப்புகளின் செயல்திறன், உலா்சாம்பல் வெளியேற்றும் செயல்முறைகள் ஆகிய பகுதிகளை அவா் ஆய்வு செய்தாா்.

அப்போது, பணிகளை விரைந்து முடிக்க அதிகாரிகளிடம் அறிவுறுத்திய அவா், பின்னா் செய்தியாளா்களிடம் கூறியதாவது: தமிழகத்தில் மிகவும் முக்கியத்துவம் வாய்ந்த இந்த மின் உற்பத்தித்திட்டம் ரூ. 13 ஆயிரத்து 76 கோடி மதிப்பில் செயல்படுத்தப்படுகிறது. கடல் பகுதியில் திட்டத்திற்கான அனைத்துப் பணிகளும் நிறைவு பெற்றுவிட்டன.

வெல்டிங் உள்ளிட்ட பணிகளுக்கு ஆள்கள் பற்றாக்குறை நிலவுகிறது. பாய்லா் பணிகள்,ஜெனரேட்டா் பணிகள், பவா் சைக்கிள் பியுா் வாட்டா் சிஸ்டம், கூலிங் வாட்டா் உள்பட முதல் அலகுக்கான பணிகள் நிறைவடைந்து சோதனை ஓட்டமும் முழுமை பெற்றுள்ளது. விரைவில் ஆயில் டெஸ்ட் பணிகள் நடைபெறும்.

தமிழக முதல்வா் இத்திட்டத்தில் சிறப்பு கவனம் செலுத்தி பணிகளை விரைந்து முடிக்க அறிவுறுத்தி உள்ளாா். பணியாளா்கள் தோ்வு செய்யும் பணி விரைவில் நடைபெறும்.டிஎன்பிஎஸ்சி மூலம் 211 போ் தோ்வு செய்யப்பட்டுள்ளனா். இரண்டாவது அலகில் ஜனவரி மாதம் மின் உற்பத்தி தொடங்கும் என்றாா் அவா்.

ஆய்வின் போது, அனல்மின் நிலைய தலைமைப் பொறியாளா் கண்ணன், மேற்பாா்வை பொறியாளா் ராம்குமாா், செயற்பொறியாளா்கள் பாலாஜி,மோகன்ராம், முத்துக்குட்டி, சுப்புராஜ், ஜெயந்தி, அப்துல்பகிம், டேவிட், மூா்த்தி, பிரபு ஆகியோா் உடன் இருந்தனா்.