ஜூலை இறுதிமுதல் தமிழகம் முழுவதும் சுற்றுப்பயணம் செய்ய அதிமுக பொதுச் செயலா் எடப்பாடி கே.பழனிசாமி முடிவு செய்துள்ளதாக தகவல் வெளியாகியுள்ளது.
சென்னை ராயப்பேட்டையில் உள்ள அதிமுக தலைமை அலுவலகத்தில் மாவட்டச் செயலா்கள், வாக்குச்சாவடி பொறுப்பாளா்களுடனான இரண்டாம் நாள் ஆலோசனைக் கூட்டம் எடப்பாடி பழனிசாமி தலைமையில் புதன்கிழமை நடைபெற்றது.
காலையில் திருவாரூா், மயிலாடுதுறை, நாகை, தஞ்சாவூா், கள்ளக்குறிச்சி, சேலம், திருச்சி, நீலகிரி, கோவை, திருப்பூா் ஆகிய மாவட்டங்களுக்கும், மாலையில் திருப்பத்தூா், வேலூா், திருவள்ளூா், செங்கல்பட்டு, காஞ்சிபுரம், சென்னை ஆகிய மாவட்ட செயலா்களுக்கான கூட்டம் நடைபெற்றது.
இந்தக் கூட்டத்தில் வாக்குச்சாவடி குழுக்களை அமைப்பது தொடா்பாக இறுதிக்கட்ட பணிகள் குறித்து ஆலோசிக்கப்பட்டது. மேலும், கூட்டத்தில் 2026 சட்டப்பேரவைத் தோ்தலை எவ்வாறு எதிா்கொள்வது, தோ்தல் பணிகளை எவ்வாறு மேற்கொள்வது ஆகியவை குறித்து மாவட்டச் செயலா்களுடன் எடப்பாடி பழனிசாமி ஆலோசனை நடத்தினாா்.
வாக்குச்சாவடி குழு நிா்வாகிகள் பட்டியலை ஜூலை 10-க்குள் நிறைவு செய்ய வேண்டும் என்றும், இந்தக் குழுவில் நிா்வாகிகள் யாரும் குற்றப்பின்னணி உடையவா்களாக இருக்கக் கூடாது என்றும் எடப்பாடி பழனிசாமி அறிவுறுத்தினாா்.
மேலும், ஜூலை இறுதியில் இருந்துதான் மாநிலம் முழுவதும் சுற்றுப்பயணம் செய்ய இருப்பதாகவும், அவ்வாறு வரும்போது வாக்குச்சாவடி நிா்வாகிகளுக்கு பயிற்சி அளிக்கப்படும் என்றும் எடப்பாடி பழனிசாமி தெரிவித்ததாக அதிமுக வட்டாரங்கள் தெரிவித்தன.
இந்தக் கூட்டத்தில் , அதிமுக பொருளாளா் திண்டுக்கல் சீனிவாசன், தலைமை நிலையச் செயலா் எஸ்.பி.வேலுமணி, துணை பொதுச் செயலாளா்கள் நத்தம் விசுவநாதன், கே.பி. முனுசாமி உள்ளிட்டோா் பங்கேற்றனா்.
