கட்டாயக் கல்வி உரிமைச் சட்டம் குறித்த அறிவிப்பு: பலகையை தனியாா் பள்ளிகள் முன்பு வைக்கக் கோரிக்கை

கோவை மாவட்டத்தில் கட்டாயக் கல்வி உரிமைச் சட்டம் குறித்த அறிவிப்புப் பலகையை தனியாா் பள்ளிகள் முன்பு வைக்க வேண்டும் என்று சமூக நீதிக்கட்சி வலியுறுத்தியுள்ளது.

இது தொடா்பாக அந்த அமைப்பின் தலைவா் ந.பன்னீா்செல்வம், கோவை மாவட்ட ஆட்சியா் பவன்குமாா் க.கிரியப்பனவரிடம் திங்கள்கிழமை அளித்த மனுவில் கூறியிருப்பதாவது: தனியாா் பள்ளிகளில் எல்கேஜி முதல் 8-ஆம் வகுப்பு வரை கட்டாயக் கல்வி உரிமைச் சட்டம் 2009-இன் கீழ் இலவசக் கல்வி வழங்க தனியாா் பள்ளிகளுக்கு அரசு நிதி வழங்குகிறது.

பள்ளி சுற்றுவட்டாரத்தில் இருக்கும் குழந்தைகளை இந்தத் திட்டத்தின் கீழ் சோ்க்கும் தனியாா் பள்ளிகள், அரசிடம் இருந்து நிதியைப் பெறுவதுடன் சம்பந்தப்பட்ட குழந்தையின் பெற்றோரிடமும் கட்டணம் வசூலிப்பதாக புகாா்கள் வருகின்றன.

இந்த நிலையில் மாநகரில் உள்ள சில தனியாா் பள்ளிகளில் இந்த சட்டம் குறித்த அறிவிப்புப் பலகையே வைக்கப்படுவதில்லை. எனவே மாவட்ட நிா்வாகம் இது தொடா்பாக விசாரித்து, தனியாா் பள்ளிகளின் முன்பு கட்டாயக் கல்வி உரிமைச் சட்டத்தின் கீழ் மாணவா் சோ்க்கை நடைபெறுவது தொடா்பான விவரங்களை வைக்க உத்தரவிட வேண்டும் என்று வலியுறுத்தியுள்ளாா்.

அம்பேத்கருக்கு சிலை

இது தொடா்பாக இந்து மக்கள் கட்சி - தமிழகம், கோவை மாவட்டத் தலைவா் வி.வி.மாணிக்கம் அளித்த மனுவில், கோவை மாவட்டத்தில் உள்ள சட்டமேதை அம்பேத்கரின் உருவச்சிலை, அரசுக்குச் சொந்தமான இடத்தில் இருப்பதால் ஒவ்வொரு நிகழ்வுக்கும் அரசு அனுமதி பெற்றுச் சென்று சிலைக்கு மாலை அணிவிக்க வேண்டியுள்ளது. எனவே, அம்பேத்கருக்கு நீதிமன்ற நுழைவாயில் பகுதியில் உருவச்சிலை அமைக்க வேண்டும். இல்லாவிட்டால் சாலையில் உள்ள ரவுண்டானா பகுதியில் அம்பேத்கருக்கு சிலை நிறுவ வேண்டும் என்று வலியுறுத்தியுள்ளாா்.

வண்டல் எடுக்க அனுமதி

இது குறித்து தமிழக விவசாயிகள் சங்கத்தின் (கட்சி சாா்பற்றது) தலைவா் டி.வேணுகோபால் அளித்த மனுவில், சிறுமுகை மற்றும் சுற்றுவட்டாரப் பகுதிகளில் உள்ள விவசாயிகள், பவானிசாகா் அணையில் நீா்மட்டம் குறையும்போது, வண்டல் மண் எடுத்து விவசாயத்துக்கு பயன்படுத்துவது வழக்கம். வரும் மே, ஜூன் மாதங்களில் மட்டுமே இந்த மண்ணை எடுக்க முடியும். எனவே பருவமழைக் காலம் தொடங்கும் முன்னரே வண்டல் மண் எடுக்க அரசு அனுமதி அளிக்க வேண்டும் என்று வலியுறுத்தியுள்ளாா்.

கல்வி நிறுவனங்களில் அரசியல் கூட்டம்

இது தொடா்பாக மறுமலா்ச்சி மக்கள் இயக்கத்தின் தலைவா் வே.ஈசுவரன் அளித்த மனுவில், பள்ளி, கல்லூரி வளாகங்களை அரசியல் கட்சிக் கூட்டங்களுக்கு பயன்படுத்த அனுமதி அளித்தால் ஒவ்வொரு அரசியல் கட்சியும் தங்களின் கூட்டங்களை பள்ளி, கல்லூரி வளாகத்திலேயே நடத்தும் சூழல் உருவாகும். இதனால் மாணவா்களின் கற்கும் சூழல் பாதிக்கப்படும் என்பதுடன், மாணவா்களை அரசியல் நிகழ்ச்சிகளுக்கு பயன்படுத்திக் கொள்வதுடன், கல்லூரி வளாக மோதலுக்கு வழிவகுக்கும்.

இதேபோல ஒரு பள்ளி வளாகத்தில் திமுக சாா்பில் கபடிப் போட்டி நடத்தப்பட இருந்த நிலையில், அதிகாரிகளிடம் அளித்த புகாரின்பேரில் இடமாற்றம் செய்யப்பட்டது. எனவே கோவையில் உள்ள தனியாா் கல்லூரியில் தவெக பூத் கமிட்டு கூட்டம் நடத்த அனுமதி அளித்தவா்கள் மீது நடவடிக்கை எடுப்பதுடன், சம்பந்தப்பட்ட கல்வி நிறுவனம் மீதும் நடவடிக்கை எடுக்க வேண்டும் என்று வலியுறுத்தியுள்ளாா்.