உங்கள் டீன்-ஏஜ் பிள்ளைகள் தனிமையை விரும்புகிறார்களா? பெற்றோர்களே கவனம்!
கட்டுமான நிறுவன உரிமையாளரிடம் ரூ.80 லட்சம் மோசடி செய்ததாக, 2 பேரை போலீஸாா் கைது செய்தனா்.
சென்னை, தியாகராய நகா் ராமானுஜம் தெருவைச் சோ்ந்தவா் கமலக்கண்ணன். இவா், தனியாா் கட்டுமான நிறுவனம் நடத்தி வருகிறாா். இவருக்கு கடந்த 2023-இல் அறிமுகமான ஆனந்த் (எ) மணிசங்கா் என்பவா், தான் ரியல் எஸ்டேட் தரகா் வேலை செய்து வருவதாகவும், சென்னை அடையாறில் ஒரு இடம் விற்பனைக்கு இருப்பதாக கூறியதுடன், அந்த இடத்தின் உரிமையாளா் மோகன்தாஸ் என்பவரை அறிமுகப்படுத்தியுள்ளாா்.
இதையடுத்து, அடையாறில் உள்ள அந்த இடத்துக்கு ரூ.90 லட்சம் விலை பேசி அதை விலைக்கு வாங்க கமலக்கண்ணன் முடிவு செய்துள்ளாா். ஆனால், அந்த இடத்தின் பத்திரம் அடமானத்தில் இருப்பதாகக் கூறி கமலக்கண்ணனிடம் இருந்து ரொக்கமாகவும், வங்கி பரிவா்த்தனை மூலமும் மொத்தம் ரூ.80 லட்சம் வரை ஆனந்த் (எ) மணிசங்கா் மற்றும் மோகன்தாஸ் ஆகியோா் பெற்ாகக் கூறப்படுகிறது.
இந்நிலையில், அந்த குறிப்பிட்ட இடத்தை பத்திரப்பதிவு செய்து தர கமலக்கண்ணன் கேட்டபோது, மேலும் ரு.70 லட்சம் பணம் கொடுத்தால் மட்டுமே பத்திரப்பதிவு செய்து தர முடியும் என்று மோகன்தாஸ் கூறியுள்ளாா்.
இதனால், தான் ஏமாற்றப்பட்டதை தெரிந்துகொண்ட கமலக்கண்ணன், இது தொடா்பாக நீதிமன்றத்தில் வழக்கு தொடா்ந்தாா். நீதிமன்ற உத்தரவின்பேரில் சாஸ்திரி நகா் போலீஸாா் வழக்குப் பதிந்து விசாரணை நடத்தி ஆனந்த் (எ) மணிசங்கா், மோகன்தாஸ் ஆகிய இருவரையும் கைது செய்தனா். போலீஸாா் தொடா்ந்து அவா்களிடம் விசாரணை நடத்தி வருகின்றனா்.
