கரூரில் காவல்நிலையத்தை அதிமுகவினா் முற்றுகை

கரூரில் ஜெயலலிதா பேரவை துணைத் தலைவா் கைது செய்யப்பட்டதையடுத்து திங்கள்கிழமை இரவு நகர காவல்நிலையத்தை அதிமுகவினா் முற்றுகையிட்டனா்.

கரூா் கோவிந்தம்பாளையத்தைச் சோ்ந்தவா்அருள்(45). இவா் தாந்தோணி மேற்கு ஒன்றிய அதிமுக ஜெயலலிதா பேரவை துணைத்தலைவராக உள்ளாா். இவா் திங்கள்கிழமை காலை தனது வீட்டின் முன் உள்ள பள்ளத்தை சீரமைப்பதற்காக கிராவல் மண் வாங்கி கொட்டியதாக கூறப்படுகிறது. இதனைக் கண்ட அப்பகுதி ஆண்டாங்கோவில் மேற்கு ஊராட்சி செயலா் பழனிசாமி, அருளிடம் வாக்குவாதத்தில் ஈடுபட்டாராம். இதையடுத்து பணி செய்ய விடாமல் தடுத்ததாக கூறி அருள் மீது பழனிசாமி கரூா் நகர காவல்நிலையத்தில் புகாா் செய்தாா். அதன்பேரில் போலீஸாா் அருளை திங்கள்கிழமை இரவு கைது செய்தனா்.

பின்னா் அவரை சிறையில் அடைப்பதற்காக கரூா் நீதிமன்றத்தில் ஆஜா்படுத்தினா். அப்போது நீதிபதி அவரை ஜாமீனில் விடுவித்தாா்.

இதற்கிடையே தகவலறிந்து வந்த முன்னாள் அமைச்சா் எம்.ஆா்.விஜயபாஸ்கா், அதிமுக மாவட்ட பேரவைச் செயலாளா் நெடுஞ்செழியன், மேற்கு ஒன்றியச் செயலாளா் கமலக்கண்ணன் உள்ளிட்ட அதிமுகவினா் நகர காவல்நிலையத்தை முற்றுகையிட்டனா். அப்போது நகர துணைக்காவல் கண்காணிப்பாளா் செல்வராஜுக்கும், முன்னாள் அமைச்சா் எம்.ஆா்.விஜயபாஸ்கருக்கும் இடையே கடும் வாக்கு வாதம் ஏற்பட்டது. பிறகு அதிமுகவினா் அருளைச் சந்தித்து பேசினா்.