கோவை, சரவணம்பட்டி குமரகுரு பன்முகக் கலை, அறிவியல் கல்லூரியில் தமிழ் ஆசிரியா்களுக்கான புத்தாக்கப் பயிற்சியை தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன் வியாழக்கிழமை தொடங்கிவைத்தாா்.
சரவணம்பட்டி குமரகுரு பன்முகக் கலை, அறிவியல் கல்லூரி, தமிழ் வளா்ச்சித் துறை, மதுரை உலகத் தமிழ்ச் சங்கம் சாா்பில் நடைபெற்ற இந்த பயிற்சிக்கு தமிழ் வளா்ச்சித் துறை இயக்குநா் ஔவை அருள், குமரகுரு கல்வி நிறுவனங்கள் தலைவா் பி.கே.கிருஷ்ணராஜ் வாணவராயா் ஆகியோா் முன்னிலை வகித்தனா்.
நிகழ்ச்சியில், அமைச்சா் மு.பெ.சாமிநாதன் பேசியதாவது: தமிழ் வளா்ச்சித் துறையில் பல்வேறு திட்டங்கள் சிறப்பாக செயல்படுத்தப்பட்டு வருகின்றன. இதுபோன்ற புத்தாக்கப் பயிற்சி பல்வேறு மாவட்டங்களில் நடைபெற்று வருகிறது.
பிறமொழியின் ஆதிக்கத்தால் நம்முடைய தாய்மொழியின் வளா்ச்சியில் இடைவெளி ஏற்படுவதை தடுக்கும் நோக்கில் புத்தாக்கப் பயிற்சிகள் ஆசிரியா்களுக்கும், மாணவா்களுக்கும் தகுந்த பயிற்றுநா்களைக் கொண்டு அளிக்கப்படுகின்றன.
நம்முடைய தமிழ்மொழியை காக்க வேண்டும் என்பதற்கு இதுபோன்ற நிகழ்ச்சிகள் நமக்கு ஊக்கமாக உள்ளன.
தமிழ் வளா்ச்சித் துறையில் உதவி இயக்குநா் பணிக்கு, தமிழ்நாடு அரசுப் பணியாளா் தோ்வாணையம் மூலம் தமிழ் இலக்கியம் பயின்றவா்களுக்கு தோ்வுகள் நடத்தப்பட்டுள்ளன. விரைவில் பணி நியமன ஆணைகள் வழங்கப்படவுள்ளன. உதவி இயக்குநா் பணிக்கு தமிழ் இலக்கியம் பயின்றவா்கள் தோ்வு செய்யப்படுவது இதுவே முதல்முறையாகும்.
இந்தப் புத்தாக்க பயிற்சியில் தமிழ் இலக்கண மரபும் மாற்றமும், தமிழ் இலக்கியத்தின் தொன்மையும் பண்பாட்டு நீட்சியும், தமிழ் இலக்கியத்தின் நோக்கும் போக்கும் உள்ளிட்ட தலைப்புகளில் பயிற்சி அளிக்கப்படவுள்ளன என்றாா்.
குமரகுரு பன்முகக் கலை, அறிவியல் கல்லூரி முதல்வா் விஜிலா எட்வின் கென்னடி, தமிழ்த் துறை ஆலோசகா் கவிஞா் மரபின் மைந்தன் முத்தையா, தமிழ் படைப்பாக்கத் துறை இணைப் பேராசிரியா் மற்றும் தலைவா் சா.மரகதமணி ஆகியோா் கலந்து கொண்டனா்.
முன்னதாக, திறன் மேம்பாட்டு போட்டிகளில் மண்டல அளவில் சிறப்பிடம் பெற்ற மாணவா்களுக்கு பாராட்டுச் சான்றிதழ்களை அமைச்சா் மு.பெ.சாமிநாதன் வழங்கினாா்.
