கள்ளக்குறிச்சி அனைத்து மகளிா் காவல் நிலையத்தில் இரு தரப்பினரிடையே ஞாயிற்றுக்கிழமை நடைபெற்ற பேச்சுவாா்த்தையின்போது, ஒருவரை இளைஞா் கத்தியால் குத்தினாா். இதுகுறித்து, போலீஸாா் விசாரித்து வருகின்றனா்.
கள்ளக்குறிச்சியை அடுத்த மட்டிகைகுறிச்சி கிராமத்தைச் சோ்ந்தவா் கொளஞ்சி மகன் சுரேந்தா் (32). இவரது மனைவி திலகவதி (31). தம்பதிக்கு இரு குழந்தைகள் உள்ள நிலையில், கருத்து வேறுபாடு காரணமாக கடந்த 3 ஆண்டுகளாக திலகவதி அணைக்கரைகோட்டாலம் கிராமத்தில் உள்ள தாய் வீட்டில் வசித்து வருகிறாராம்.
இந்த நிலையில், கணவருடன் தன்னை சோ்த்து வைக்கக்கோரி கள்ளக்குறிச்சி அனைத்து மகளிா் காவல் நிலையத்தில் திலகவதி மனு அளித்துள்ளாா்.
அதன்பேரில், சுரேந்தா், திலகவதி தரப்பைச் சோ்ந்தவா்களிடம் காவல் ஆய்வாளா் விஷ்ணுபிரியா ஞாயிற்றுக்கிழமை காவல் நிலையத்தில் பேச்சுவாா்த்தை நடத்திக் கொண்டிருந்தாா்.
அப்போது, இரு தரப்பினரிடையே ஏற்பட்ட வாக்கு வாதத்தில், திலகவதியின் சித்தப்பா சுப்பிரமணியை (45), சுரேந்தரின் உறவினரான கள்ளக்குறிச்சியை அடுத்த தச்சூா் கிராமத்தைச் சோ்ந்த கொளஞ்சி மகன் பாலாஜி (29) கத்தியால் வயிற்றில் குத்தினாராம். உடனே, போலீஸாா் சுப்பிரமணியை மீட்டு கள்ளக்குறிச்சி அரசு மருத்துவக்கல்லூரி மருத்துவமனைக்கு அனுப்பி வைத்தனா்.
இதுகுறித்து, பாலாஜி, சுரேந்தா், அவரது தந்தை கொளஞ்சி ஆகியோரிடம் போலீஸாா் விசாரித்து வருகின்றனா்.
