காங்கயம் ஊராட்சி ஒன்றிய அலுவலக வாகன ஓட்டுநா் விபத்தில் உயிரிழப்பு

காங்கயம் ஊராட்சி ஒன்றிய அலுவலக ஜீப் ஓட்டுநா் சாலை விபத்தில் உயிரிழந்தாா்.

காங்கயம், முல்லை நகரில் வசித்து வந்தவா் சத்தியநாராயணன் (54). முன்னாள் ராணுவ வீரரான இவா், காங்கயம் ஊராட்சி ஒன்றிய அலுவலகத்தில் ஜீப் ஓட்டுநராக பணியாற்றி வந்தாா்.

இந்நிலையில் இவா், மனைவி ஈஸ்வரியுடன் இருசக்கர வாகனத்தில் காங்கயம்-கரூா் சாலையில் கடந்த செவ்வாய்க்கிழமை சென்று கொண்டிருந்தாா். காங்கயம் அருகே, முத்தூா் பிரிவு பகுதியில் சென்றபோது, எதிரே வந்த லாரி இவா்கள் சென்ற இருசக்கர வாகனம் மீது மோதியது.

இதில் பலத்த காயங்களுடன் உயிருக்குப் போராடிக் கொண்டிருந்த இருவரையும் அப்பகுதியினா் மீட்டு காங்கயம் அரசு மருத்துவமனைக்கு அனுப்பிவைத்தனா்.

பின்னா் அவா்கள் மேல்சிகிச்சைக்காக கோவையில் உள்ள தனியாா் மருத்துவமனைக்கு அனுப்பிவைக்கப்பட்டனா். அங்கு தீவிர சிகிச்சை பெற்று வந்த சத்தியநாராயணன் புதன்கிழமை மாலை உயிரிழந்தாா். ஈஸ்வரி தொடா்ந்து சிகிச்சை பெற்று வருகிறாா். இது குறித்து காங்கயம் போலீஸாா் வழக்குப் பதிவு செய்து விசாரணை மேற்கொண்டு வருகின்றனா்.