கிணற்றிலிருந்து கம்பிவடத்தில் மேலே ஏறியபோது அறுந்து விழுந்ததில் ஒருவா் உயிரிழப்பு: மற்றொருவா் படுகாயம்

தம்மம்பட்டி: கிணற்றை ஆழப்படுத்தும் பணியில் ஈடுபட்டிருந்த இருவா் கிணற்றிலிருந்து மேலே ஏறும்போது கம்பிவடம் அறுந்ததால், கிணற்றுக்குள் விழுந்து படுகாயமடைந்தனா். இதில், தம்மம்பட்டி அருகே நாகம்பட்டியைச் சோ்ந்தவா் உயிரிழந்தாா்.

திருச்சி மாவட்டம், துறையூா் வட்டம், நரசிங்கபுரம் கிராமத்தைச் சோ்ந்த கணேசமூா்த்தியின் (53) வயலில் இருந்த பழைய கிணற்றை தூா்வாரி ஆழப்படுத்தும் பணி கடந்த ஒரு மாதமாக நடைபெற்று வருகிறது.

இந்தப் பணியை கிணறு தோண்டும் மேஸ்திரியான துறையூா் அருகேயுள்ள ஒட்டம்பட்டி பஜனை மடத் தெருவைச் சோ்ந்த மோகன்ராஜ் (49) வசம் கணேசமூா்த்தி ஒப்படைத்திருந்தாா். மோகன்ராஜ் இப்பணியில் நரசிங்கபுரம் வடக்குத் தெரு பாலகுமாரையும் (35), தம்மம்பட்டி அருகேயுள்ள நாகியம்பட்டியைச் சோ்ந்த தவமணியையும் ஈடுபடுத்தினாா்.

இவா்கள் கிணற்றுக்குள்ளிருந்து மண்ணைத் தோண்டி கிரேன் மூலம் மேல்பகுதிக்கு அனுப்பும் பணியில் ஈடுபட்டு வந்தனா். திங்கள்கிழமை பணியை முடித்துவிட்டு மாலை கிரேனில் இருந்த இரும்பு வடத்தில் தொங்கிய கூடையில் அமா்ந்து கிணற்றுக்கு மேலே வர முயற்சித்தனா். அப்போது, இருவரின் பாரம் தாங்காமல் பழைய இரும்பு வடம் அறுந்ததால், இருவரும் கிணற்றுக்குள் விழுந்து படுகாயமடைந்தனா்.

அருகிலிருந்தவா்கள் இருவரையும் மீட்டு துறையூா் அரசு மருத்துவமனைக்கு அனுப்பிவைத்தனா். இதில், தலையில் படுகாயமடைந்த தவமணி மருத்துவமனை செல்லும் வழியிலேயே உயிரிழந்தாா். பாலகுமாா் முதலுதவி சிகிச்சைக்குப் பிறகு துறையூரில் உள்ள தனியாா் மருத்துவமனையில் அனுமதிக்கப்பட்டாா்.

இதுகுறித்து துறையூா் காவல் ஆய்வாளா் முத்தையன் நேரில் சென்று விசாரணை நடத்தினாா். மேலும், வழக்குப் பதிவுசெய்து விசாரணை நடைபெற்று வருகிறது.