கிண்டி: `அம்மாவுக்கு சரியா சிகிச்சை அளிக்கல’ மருத்துவருக்கு கத்திகுத்து; போராட்டத்தில் மருத்துவர்கள்

சென்னை கிண்டியில் அரசு பன்நோக்கு மருத்துவமனை செயல்பட்டு வருகிறது. இந்த மருத்துவமனையில் புற்றுநோய் பிரிவில் பெரும்பாக்கத்தைச் சேர்ந்த பெண் ஒருவர் சிகிச்சை பெற்று வருகிறார். இவருக்கு சரியாக சிகிச்சை அளிக்கப்படவில்லை என அந்தப் பெண்ணின் மகன் விக்னேஷ் என்பவர் மருத்துவமனையில் தகராறில் ஈடுபட்டு வந்திருக்கிறார்.

இந்தநிலையில் இன்று (13.11.2024) காலை புற்றுநோய் சிகிச்சை பிரிவில் டாக்டர் பாலாஜி ஜெகநாதன் பணியில் இருந்தார். அப்போது டாக்டரிடம் விக்னேஷ் என்பவர், `என்னுடைய அம்மாவுக்கு ஏன் இன்னும் குணமாகவில்லை. ஹாஸ்பிட்டலில் சரியாக சிகிச்சை அளிப்பதில்லை’ என தகராறில் ஈடுபட்டுள்ளார். அதனால் அங்கிருந்தவர்கள் விக்னேஷை சமரசப்படுத்த முயன்றனர்.

வாக்குவாதத்தில் ஈடுபட்ட விக்னேஷ், திடீரென மறைத்து வைத்திருந்த கத்தியை எடுத்து டாக்டர் பாலாஜி ஜெகநாதனைக் குத்தினார். இதில் நிலை குலைந்த அவர், ரத்த வெள்ளத்தில் கீழே சரிந்தார். டாக்டரை குத்தி விட்டு தப்பி ஓட முயன்ற விக்னேஷை அங்கிருந்தவர்கள் மடக்கிப் பிடித்தனர். பின்னர், காயமடைந்த டாக்டரை மீட்டு அவருக்கு முதலுதவி அளிக்கப்பட்டு அதே அரசு மருத்துவமனையில் சிகிச்சைக்காக சேர்த்தனர்.

இந்தச் சம்பவம் குறித்து காவல் நிலையத்துக்கு மருத்துவமனையிலிருந்து தகவல் தெரிவிக்கப்பட்டது. உடனடியாக சம்பவ இடத்துக்கு இணை கமிஷனர் சிபிசக்கரவர்த்தி தலைமையிலான போலீஸார் விரைந்து வந்து விக்னேஷை பிடித்து காவல் நிலையத்துக்கு அழைத்துச் சென்றனர்.

தொடர்ந்து என்ன நடந்தது என்று போலீஸார் அங்குள்ளவர்களிடம் விசாரணை நடத்தி வருகின்றனர். இதற்கிடையில் சம்பவம் குறித்து தகவலறிந்த அமைச்சர் மா.சுப்பிரமணியன், மருத்துவமனைக்கு நேரில் சென்று காயமடைந்த டாக்டரிடம் நலம் விசாரித்தார். அதோடு டாக்டரை கத்தியால் குத்தியவர் மீது சட்டப்படி நடவடிக்கை எடுக்கப்படும் என தெரிவித்தார். இந்தச் சூழலில் அரசு மருத்துவர்கள், பணியின் போது தங்களுக்கு பாதுகாப்பில்லை என வலியுறுத்தி வேலை நிறுத்த போராட்டத்தை அறிவித்துள்ளனர்.

இதுகுறித்து பேசிய தமிழ்நாடு அரசு மருத்துவர்கள் சங்கத்தின் தலைவர் செந்தில், ``கிண்டியில் அரசு மருத்துவர் கத்தியால் குத்தப்பட்ட சம்பவத்தைக் கண்டித்து காலவரையற்ற வேலை நிறுத்த போராட்டத்தில் ஈடுபட உள்ளோம். அரசு மருத்துவர்களுக்கு போதிய பாதுகாப்பு வழங்கப்பட வேண்டும். அதுவரை எங்களின் போராட்டம் தொடரும்" என்றார். அமைச்சர் மா.சுப்பிரமணியன் மருத்துவர்களுடன் பேச்சுவார்த்தையில் ஈடுபட்டு வருகிறார். இதனிடையே துணை முதல்வர் உதயநிதி ஸ்டாலினும் மருத்துவமனைக்கு சென்று ஆய்வு மேற்கொண்டார்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/UlagaiMaatriyaThalaivargal