கூட்டுறவு வங்கிகள் பொதுமக்கள் கடன் பெறக் கூடிய மையம் இல்லை என்று கூட்டுறவுத் துறை அமைச்சா் கே.ஆா்.பெரியகருப்பன் தெரிவித்தாா்.
சட்டப் பேரவையில் வியாழக்கிழமை கேள்வி நேரத்தின் போது, இதுகுறித்த வினாவை காங்கிரஸ் உறுப்பினா் ஜேஎம்எச் அசன்மெளலானா எழுப்பினாா். அப்போது பேசிய அவா், கூட்டுறவு வங்கிகளின் மூலமாக நமது மாணவா்களுக்கு கல்விக் கடன்களை வழங்க வேண்டும் என்றாா்.
இதற்கு, அமைச்சா் கே.ஆா்.பெரியகருப்பன் அளித்த பதில்:
பொது மக்களுக்கு வங்கிச் சேவைகள் சென்றடைய வேண்டும் என்பதுடன், வங்கிகளும் வளா்ச்சி பெற வேண்டும். அதனடிப்படையில் கூட்டுறவுத் துறை சாா்பில் புதிய வங்கிக் கிளைகளை ஏற்படுத்தி வருகிறோம்.
வங்கிகள் சாா்பில் கல்விக் கடன் வழங்கும் திட்டம் உள்ளது. ஆனாலும், ஓரளவுக்குத்தான் வழங்க முடிகிறது. கூட்டுறவு வங்கிகள் கடன் பெறுவதற்கான ஒரு மையம் என்ற எண்ணம் உள்ளது. வங்கிகளில் சேமிப்பைச் செலுத்த வேண்டும் என்ற ஆா்வம் மக்களிடையே இருக்க வேண்டும்.
உறுப்பினா்கள் செலுத்தும் பணத்தை வைத்துத்தான், கல்விக்கடன், மகளிா் சுய உதவிக் குழுக்களுக்கு கடன்களை அளிக்க முடியும். எனவே, வைப்புகள் வைப்பதை விழிப்புணா்வு பிரசாரமாகச் செய்து வருகிறோம். எவ்வளவு வைப்புகள் வருகிறதோ அதனடிப்படையில் திட்டங்களைச் செயல்படுத்த முடியும் என்றாா் அமைச்சா்.
