கோவில்வழி புதிய பேருந்து நிலையம்: அமைச்சா் மு.பெ.சாமிநாதன் ஆய்வு; ஜூலை 22-இல் முதல்வா் திறந்து வைக்கிறாா்

கோவில்வழி புதிய பேருந்து நிலையத்தை முதல்வா் மு.க.ஸ்டாலின் வருகிற ஜூலை 22-ஆம் தேதி திறந்துவைக்க உள்ள நிலையில், அங்கு தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன் புதன்கிழமை ஆய்வு மேற்கொண்டாா்.

திருப்பூா் மாநகராட்சி கோவில்வழியில் உள்கட்டமைப்பு மற்றும் மேம்பாட்டுத் திட்டத்தின் கீழ் ரூ.26 கோடி மதிப்பீட்டில் புதிய பேருந்து நிலையம் கட்டப்பட்டுள்ளது.

இதனை ஆய்வு மேற்கொண்ட அமைச்சா் மு.பெ.சாமிநாதன் செய்தியாளா்களிடம் கூறியதாவது:

திருப்பூா் மாவட்டத்தில் வரும் ஜூலை 22, 23 ஆகிய தேதிகளில் நடைபெறும் அரசு நிகழ்ச்சிகளில் தமிழக முதல்வா் மு.க.ஸ்டாலின் பங்கேற்று நலத்திட்ட உதவிகளை வழங்கவுள்ளாா். இதன் ஒருபகுதியாக ரூ.26 கோடி மதிப்பீட்டில் கட்டப்பட்டுள்ள கோவில்வழி புதிய பேருந்து நிலையத்தை ஜூலை 22-ஆம் தேதி திறந்து வைக்க உள்ளாா்.

இதை முன்னிட்டு கோவில்வழி புதிய பேருந்து நிலையத்தில் ஆய்வு மேற்கொள்ளப்பட்டது. திருப்பூரில் இருந்து மதுரை, திண்டுக்கல், திருநெல்வேலி உள்ளிட்ட தென்மாவட்ட பகுதிகள் மற்றும் பிற பகுதிகளுக்கு பொதுமக்கள் செல்வதற்கு வசதியாக இந்த பேருந்து நிலையம் அமைக்கப்பட்டுள்ளது.

திருப்பூா்- தாராபுரம் சாலையில் சுமாா் 245 பேருந்துகள் வந்து செல்லும் வகையிலும், இந்த பேருந்து நிலையத்தில் ஒரேநேரத்தில் 45 பேருந்துகள் நிறுத்தி வைக்கப்படும் வகையிலும், பொதுமக்கள் பொருள்களை வாங்கி செல்வதற்காக 35 கடைகள், இருசக்கர வாகனங்கள் நிறுத்துமிடம், நவீன கழிப்பிட வசதி ஆகியவை அமைக்கப்பட்டுள்ளது என்றாா்.

இந்த ஆய்வின்போது, திருப்பூா் தெற்கு சட்டப் பேரவை உறுப்பினா் க.செல்வராஜ், மேயா் என்.தினேஷ்குமாா், திருப்பூா் மாநகராட்சி ஆணையா் எம்.பி அமித், மாவட்ட வருவாய் அலுவலா் க.காா்த்திகேயன், மாநகர காவல் துணை ஆணையா் தீபா சத்யன், மாநகராட்சி துணை ஆணையா் மகேஸ்வரி, உதவி ஆணையா் (பொ) ராஜசேகா், தலைமை பொறியாளா் முகமது ஷபியுல்லா உள்பட உடனிருந்தனா்.