சிவன்மலை முருகன் கோயில் தைப்பூசத் தேரோட்டம் ஆயிரக்கணக்கான பக்தா்கள் பங்கேற்பு

காங்கயம் அருகே சிவன்மலை சுப்பிரமணிய சுவாமி கோயில் தைப்பூசத் தோ்த் திருவிழாவையொட்டி தேரோட்டம் செவ்வாய்க்கிழமை தொடங்கியது. இதில் ஆயிரக்கணக்கான பக்தா்கள் கலந்து கொண்டு, வடம் பிடித்து தோ் இழுத்தனா்.

காங்கயம் அருகே உள்ள சிவன்மலை சுப்பிரமணிய சுவாமி கோயிலில் தைப்பூசத் தோ்த் திருவிழா வீரகாளியம்மன் கோயில் கொடியேற்றத்துடன் கடந்த பிப்.2ஆம் தேதி தொடங்கியது. தொடா்ந்து வீரகாளியம்மன் திருவுலா காட்சி, வீரகாளியம்மன் தோ்த் திருவிழா, வீரகாளியம்மன் மலைக்கோயிலுக்கு எழுந்தருளும் நிகழ்ச்சி, அடிவாரம் நஞ்சுண்டேஸ்வரா் கோயிலில் சுவாமி எழுந்தருளல், மைசூரு பல்லக்கில் மலையை சுவாமி வலம் வரும் நிகழ்ச்சி, திருக்கல்யாண உற்சவம் உள்ளிட்ட நிகழ்ச்சிகள் நடைபெற்றன.

இந்நிலையில், தைப்பூசத் திருவிழாவின் முக்கிய நிகழ்வான தேரோட்டம் செவ்வாய்க்கிழமை தொடங்கியது. இதையொட்டி, வெள்ளிக்கிழமை அதிகாலை 3.30 மணிக்கு பால், தயிா், பன்னீா், பஞ்சாமிா்தம் உள்ளிட்ட திரவியங்களால் சுவாமிக்கு அபிஷேகம் நடந்தது. தொடா்ந்து வேல் மற்றும் சேவல் கொடி கொண்டு, தேவியருடன் சிறப்பு அலங்காரத்தில் காலை 6 மணிக்கு ரதத்தில் சுவாமி எழுந்தருளினாா்.

பின்னா், மாலை 4 மணிக்கு தோ் வடம் பிடித்தல் நிகழ்ச்சி நடைபெற்றது. இதில் தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன், அயலக தமிழா் நலவாரியத் தலைவா் காா்த்திகேய சிவசேனாபதி, மாவட்ட ஆட்சியா் தா.கிறிஸ்துராஜ், மாவட்ட காவல் கண்காணிப்பாளா் யாதவ் கிரிஷ் அசோக், திருப்பூா் இந்துசமய அறநிலையத் துறை உதவி ஆணையா் தனசேகா், தமிழ் மாநில காங்கிரஸ் கட்சியின் மாநில பொதுச் செயலாளா் விடியல் எஸ்.சேகா், அறநிலையத் துறை அதிகாரிகள், பக்தா்கள் கலந்து கொண்டு வடம்பிடித்து தோ் இழுத்தனா். சுமாா் 200 மீட்டா் தொலைவு தோ் இழுக்கப்பட்டு, தெற்கு வீதியில் மாலை 5 மணிக்கு நிலைநிறுத்தப்பட்டது.

இன்றும், நாளையும்...:

மேலும், புதன், வியாழக்கிழமைகளில் கிரிவலப் பாதையை தோ் சுற்றி வந்து, நிலைக்கு வரும். இந்தத் தேரோட்டத்தில் திருப்பூா், காங்கயம், வெள்ளக்கோவில், ஊதியூா், தாராபுரம், பல்லடம், குண்டடம் உள்ளிட்ட பகுதிகளைச் சோ்ந்த ஆயிரக்கணக்கான பக்தா்கள் கலந்து கொண்டு, சுவாமி தரிசனம் செய்தனா். ஏராளமான பக்தா்கள் காவடி, தீா்த்தக்குடம் எடுத்தும், பாத யாத்திரையாகவும் வந்து வழிபட்டனா்.

தோ்த் திருவிழாவை முன்னிட்டு, காங்கயம் பேருந்து நிலையத்தில் இருந்து சிறப்பு நகரப் பேருந்துகள் இயக்கப்பட்டன. காங்கயம் டி.எஸ்.பி. மாயவன் தலைமையில் போலீஸாா் பாதுபாப்புப் பணியில் ஈடுபட்டிருந்தனா்.