சென்னை: நகைக்கடை ஓனருக்கு ஷாக் கொடுத்த இளம்பெண் - தங்கம், வைர நகைகளைத் திருடியது எப்படி?

சென்னை தி.நகர் டாக்டர் நாயர் சாலையில் நகைக்கடை ஒன்று செயல்பட்டு வருகிறது. இந்தக் கடையை சுரேஷ் என்பவர் நடத்தி வருகிறார். தீபாவளி பண்டிகையையொட்டி இந்த நகைக்கடையில் வாடிக்கையாளர்களின் கூட்டத்தை சமாளிக்க கூடுதலாக பணியாளர்கள் நியமிக்கப்பட்டிருந்தனர். அதில் ஒருவர் ரேவதி. இவர் விற்பனை பிரிவில் சில நாள்கள் வேலை செய்திருக்கிறார். பின்னர் அவர் வேலையிலிருந்து திடீரென நின்றுவிட்டார். அதனால் ரேவதியை தொடர்பு கொண்ட கடையில் உள்ளவர்கள் ஏன் வேலைக்கு வரவில்லை என்று விசாரித்திருக்கிறார்கள். அதற்கு அவர் உடல் நலம் சரியில்லை எனக் காரணம் கூறியதோடு வேலைப்பார்த்த நாளுக்குரிய சம்பளத்தை தரும்படி கேட்டிருக்கிறார்.

இந்தநிலையில் கடையில் நகைகளை சரிபார்த்திருக்கிறார்கள். அப்போது ரேவதி வேலைப்பார்த்த விற்பனை பிரிவில் 6 லட்சம் ரூபாய் மதிப்புள்ள தங்கம், வைர நகைகளுக்குப் பதில் கவரிங் நகைகள் வைக்கப்பட்டிருந்தை ஊழியர்கள் கண்டறிந்து ஓனருக்கு தகவல் தெரிவித்தனர். அதனால் அதிர்ச்சியடைந்த கடையின் ஓனர் சுரேஷ், இதுகுறித்து சௌந்திரபாண்டியனார் அங்காடி காவல் நிலையத்தில் புகாரளித்தார். அந்தப் புகாரில் ரேவதி என்பவரின் மீது சந்தேகம் இருப்பதாக குறிப்பிட்டிருந்தார். இதையடுத்து போலீஸ் இன்ஸ்பெக்டர் மணிமாலா தலைமையிலான போலீஸ் டீம் ரேவதி குறித்த விவரங்களை கடையில் கேட்டு பெற்றது. மேலும் கடையில் பதிவாகியிருந்த சி.சி.டி.வி கேமரா பதிவுகளையும் போலீஸார் ஆய்வு செய்தனர். அப்போது ரேவதி, கடையில் உள்ள ஒரிஜினல் தங்க நகைகள், வைர நகைகளை திருடி விட்டு அதற்குப் பதிலாக கவரிங் நகைகளை வைக்கும் காட்சி பதிவாகியிருந்தது. அதைப்பார்த்த கடையின் ஊழியர்கள், ஓனர், போலீஸார் அதிர்ச்சியடைந்தனர்.

இதையடுத்து பணியில் சேரும் போது ரேவதி கொடுத்த ஆவணங்கள் அடிப்படையில் அங்குச் சென்று போலீஸார் விசாரித்தனர். அப்போது அவை போலி எனத் தெரியவந்தது. இதையடுத்து ரேவதியின் செல்போன் சிக்னல் அடிப்படையில் போலீஸார் விசாரித்து அவரைப் பிடித்தனர். விசாரணையில் குடும்பத்தின் வறுமை காரணமாகவும் ஆடம்பரமாக வாழவும் ரேவதி நகைகளைத் திருடியது தெரியவந்தது. இதையடுத்து அவரிடமிருந்து 4.10 லட்சம் மதிப்புள்ள தங்கம், வைர நகைகளை போலீஸார் பறிமுதல் செய்யப்பட்டன. கைதான ரேவதி, எம்.கே.பிநகர், சர்மா நகரில் குடும்பத்துடன் வசித்து வருகிறார். விசாரணைக்குப்பிறகு ரேவதியை நீதிமன்றத்தில் ஆஜர்படுத்திய போலீஸார் அவரை சிறையில் அடைத்தனர்.

இதுகுறித்து போலீஸார் கூறுகையில், ``கைது செய்யப்பட்ட ரேவதி பக்காவாக பிளான் போட்டு ஒரிஜினல் தங்க, வைர நகைகளை திருடி விட்டு அதற்குப் பதிலாக கவரிங் நகைகளை வைத்திருக்கிறார். ரேவதிக்கு இந்த ஐடியாவை கொடுத்தது யார் என்று விசாரித்து வருகிறோம். வழக்கமாக நகைக்கடையில் அங்கு பணியாற்றும் ஊழியர்கள் சோதனைக்குப் பிறகே வெளியில் அனுப்பப்படுவது வழக்கம். ஆனால் ரேவதி வேலைப்பார்த்த நகைக்கடையில் அப்படி பெரியளவில் எந்தவித சோதனையும் இல்லாததால் கவரிங் நகைகளை வைத்துவிட்டு விலை உயர்ந்த வைரம், தங்க நகைகளை ரேவதி திருடி வந்திருப்பது விசாரணையில் தெரியவந்திருக்கிறது. ரேவதியை கைது செய்து சிறையில் அடைத்துள்ளோம்" என்றனர்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/UlagaiMaatriyaThalaivargal