சேலம் மாநகராட்சி வரி விதிப்பு முறையில் உள்ள குளறுபடிகளை தீா்க்க வலியுறுத்தி திமுக, அதிமுக மாமன்ற உறுப்பினா்கள் ஒருசேர குரல் எழுப்பியதால் கூச்சல், குழப்பம் ஏற்பட்டது.
சேலம் மாநகராட்சி மன்ற இயல்பு கூட்டம் மேயா் ஆ. ராமச்சந்திரன் தலைமையில் செவ்வாய்க்கிழமை நடைபெற்றது. கூட்டம் தொடங்கியதும், சட்டப்பேரவை உறுப்பினா் ஈ.வி.கே.எஸ். இளங்கோவன் மறைவுக்கு உறுப்பினா்கள் மௌன அஞ்சலி செலுத்தினா்.
பின்னா் கூட்டத்தில் மாமன்ற உறுப்பினா் ஈசன் இளங்கோ பேசியதாவது: எனது வாா்டில் உள்ள மின் மயானத்தை விரைவில் பயன்பாட்டுக்கு கொண்டுவர வேண்டும். பட்டைக்கோயில் முதல் காந்தி மைதானம் வரை சாலைகளை அகலப்படுத்தி, பேருந்து போக்குவரத்தை சீராக்க வேண்டும் என்றாா்.
அதிமுக உறுப்பினா் செல்வராஜ்:
மேட்டூா் குடிநீா் 8 அல்லது 10 நாள்களுக்கு ஒருமுறை தான் விநியோகிக்கப்படுகிறது. மேட்டூரில் இருந்து எவ்வளவு தண்ணீா் பெறப்பட்டு, எப்படி விநியோகம் செய்யப்படுகிறது என்பதை தெரிவிக்க வேண்டும். மழை பெய்தால், சிவதாபுரம் சாலையில் சேலத்தாம்பட்டி ஏரியிலிருந்து வரும் தண்ணீரால் போக்குவரத்து பாதிக்கப்படுகிறது. இதனால் வீடுகளுக்குள் தண்ணீா் புகுந்து மக்கள் பாதிக்கப்படுவதைத் தடுக்க வேண்டும். மழைநீா் வடிகால் அமைக்கும் பணிகளை துரிதப்படுத்த வேண்டும்.
மாநகராட்சி வரி விதிப்பு முறையில் பல்வேறு குளறுபடிகள் உள்ளன. சிவதாபுரம் பகுதியில் ‘ஏ’ மண்டலமாக மாற்றப்பட்ட சில பகுதிகளை மீண்டும் ‘சி’ மண்டலமாக மாற்றி, வரி உயா்வைக் குறைக்க வேண்டும் என்றாா்.
திமுக உறுப்பினா் தெய்வலிங்கம்:
சீலவரி ஏரியை குடிசை மாற்று வாரியத்துக்கும், பட்டு வளா்ச்சித் துறைக்கும் கொடுத்துள்ளோம். அதனை மீட்டு மீண்டும் ஏரியாக மாற்ற நடவடிக்கை எடுக்க வேண்டும் என்றாா்.
கொண்டலாம்பட்டி மண்டலக் குழுத் தலைவா் அசோகன்:
கொண்டலாம்பட்டி பகுதியில் வரி உயா்வைக் குறைக்க நடவடிக்கை எடுக்க வேண்டும். கொண்டலாம்பட்டி மண்டலமாக இருப்பதை தாதகாப்பட்டி மண்டலமாக பெயா் மாற்ற வேண்டும். 60ஆவது கோட்டத்தில் ஆரம்ப சுகாதார நிலையம் அமைக்க வேண்டும். நீதிமன்ற உத்தரவுப்படி வ.உ.சி. மாா்க்கெட் ஒரே இடத்தில் செயல்பட வேண்டும் என்றாா்.
எதிா்க்கட்சி தலைவா் யாதவமூா்த்தி:
மழைக் காலங்களில் மழை நிவாரணம் முறையாக வழங்கப்படுவதில்லை. பெரியாா் அங்காடியில் ஆக்கிரமிப்பு கடைகளை அகற்ற நடவடிக்கை எடுக்கவில்லை. மாநகராட்சி சாா்பில் அதிக வரி வசூலிக்கப்படுவதால் பொதுமக்கள் கடுமையாகப் பாதிக்கப்படுகின்றனா். எனவே, மாநகராட்சி நிா்வாக சீா்கேடுகளைக் கண்டித்து வெளிநடப்பு செய்வதாகக் கூறினாா்.
அப்போது அதிகாரி ஒருவா் குறுக்கீட்டு பேசியதை கண்டித்து அதிமுக உறுப்பினா்கள் யாதவமூா்த்தி தலைமையில் மேயா் முன்பு தரையில் அமா்ந்து போராட்டத்தில் ஈடுபட்டனா். அப்போது திமுக - அதிமுக உறுப்பினா்கள் இடையே கூச்சல் குழப்பம் ஏற்பட்டது. தொடா்ந்து கூட்டத்திலிருந்து அதிமுக உறுப்பினா்கள் வெளிநடப்பு செய்தனா்.
பின்னா் அவா் செய்தியாளா்களிடம் கூறியதாவது: அதிமுக ஆட்சியில் ரூ. 1,000 கோடியில் ஸ்மாா்ட் சிட்டி திட்டப் பணிகள் நடைபெற்றன. இதில் பெரியாா் பேரங்காடியை சுற்றியுள்ள கடைகளை ஏலம் எடுத்துள்ள நபா், அதைச் சுற்றிலும் கடைகளை வைத்து வசூல் செய்து வருகிறாா். இதனைத் தடுக்க வேண்டும். அல்லிகுட்டை ஏரி உள்பட பல்வேறு பணிகள் ஒப்பந்தம் விடாமலேயே நடைபெறுகிறது. அதிக வரி உயா்வால் மக்கள் கடுமையாகப் பாதிக்கப்பட்டுள்ளனா் என்றாா்.
