ஜிஎஸ்டி: நீதிமன்றம் சென்ற வணிகா்கள் ஆஜராக அழைப்பாணை அனுப்புவதை தவிா்க்க உத்தரவு -முதல்வா் ரேகா குப்தா

நமது சிறப்பு நிருபா்

ஜிஎஸ்டி வசூல் விவகாரத்தில் நீதிமன்றத்துக்குச் சென்ற வணிகா்களை நேரில் வருமாறு அழைப்பாணை அனுப்புவதை தவிா்க்க வேண்டும் என்று அதிகாரிகளுக்கு உத்தரவிட்டுள்ளதாக தில்லி முதல்வா் ரேகா குப்தா தெரிவித்தாா்.

இந்திய பட்டயக்கணக்காளா்கள் நிறுவனத்தின் (ஐசிஏஐ) சாா்பில் மூன்றாம் ஆண்டு கணக்கியல் தர தினம் கடைப்பிடிக்கப்பட்டது. இதையொட்டி, தில்லியில் சனிக்கிழமை நடைபெற்ற நிகழ்ச்சியில் சிறப்பு விருந்தினராக முதல்வா் ரேகா குப்தா கலந்துகொண்டு பேசியது வருமாறு:

சரக்கு, சேவை வரி (ஜிஎஸ்டி) வசூலிப்பு முறையில் உரிமம் பெற்றவா் நேரடியாக வந்து வரி மற்றும் பிற நடைமுறைகளை பின்பற்றுவதை தவிா்த்து வெளிப்படைத்தன்மையை ஊக்குவிப்பது அவசியம். முகமற்ற பரிவா்த்தனை (ஃபேஸ்லெஸ் டிரான்சாக்ஷன்) முறையால் இது சாத்தியம்.

ஜிஎஸ்டி வரி விவகாரத்தில் ரூ. 80 ஆயிரம் கோடி அளவுக்கு தில்லி அரசுக்கு நிலுவைத்தொகை வரவேண்டியுள்ளது. வழக்காடும் விவகாரத்தாலும் பிற காரணங்களாலும் இந்த நிலை ஏற்பட்டுள்ளது.

ஜிஎஸ்டி விவகாரத்தில் ஏற்கெனவே நீதிமன்றத்துக்கு சென்றவா்களை நேரில் விசாரணைக்கு வரச்சொல்லி அழைப்பாணை அனுப்பும் போக்கை தவிா்க்குமாறு ஜிஎஸ்டி அதிகாரிகளுக்கு உத்தரவிட்டுள்ளேன்.

முகமில்லா பரிவா்த்தனை மூலம் வெளிப்படைத்தன்மையை ஏற்படுத்த முடியும். அதற்குரிய நடவடிக்கையை எடுக்க வேண்டும். வரித்தொகையை எளிதாக செலுத்தும் வகையில் நடைமுறையை உருவாக்க வேண்டும் என்றாா் முதல்வா் ரேகா குப்தா.

இந்த மாநாட்டில் வரி செலுத்துவதில் ஏற்படும் பிரச்னைகளைத் தீா்ப்பதிலும் பொருளாதார வளா்ச்சிக்கும் பட்டயக் கணக்காளா்கள் வழங்கும் முக்கிய பங்கை பாராட்டிய முதல்வா், ‘வரி செலுத்துவது எவ்வளவு முக்கியம் என்பதை மக்களுக்குப் புரிய வைப்பது பட்டய கணக்காளா்கள்தான்’ என்றும் குறிப்பிட்டாா்.

தில்லி முதலமைச்சராக பதவியேற்றுக்கொண்ட பிறகு தாக்கல் செய்த தனது முதல் நிதிநிலை அறிக்கையை நினைவுகூா்ந்த முதல்வா், அரசாங்கத்தின் கருவூலம் கிட்டத்தட்ட காலியாக இருந்தபோதிலும், ரூ.1 லட்சம் கோடி மதிப்பிலான நிதிநிலை அறிக்கை சட்டப்பேரவையில் தாக்கல் செய்யப்பட்டது இதுவே முதல் முறை என்று கூறினாா்.

‘இத்தனை பெரிய நிதிநிலை அறிக்கையை தாக்கல் செய்த முதல்வா் யாா் என்று மக்கள் கேட்டனா். ஆனால், நான் எங்களுடைய இலக்கை எட்டுவதற்கு மக்கள் உதவுவாா்கள் என்ற நம்பிக்கையை கொண்டிருந்தேன்’ என்றாா் ரேகா குப்தா.