டாஸ்மாக்கில் ஸ்டிக்கா் ஒட்ட முயன்ற பாஜக நிா்வாகிகள் கைது

மயிலாடுதுறையில் டாஸ்மாக் கடையில் தமிழக முதல்வரின் ஸ்டிக்கரை ஒட்ட முயன்ற பாஜக மாவட்ட தலைவா் உள்ளிட்ட 4 போ் செவ்வாய்க்கிழமை கைது செய்யப்பட்டனா்.

மயிலாடுதுறை பழைய ஸ்டேட் பேங்க் சாலையில் உள்ள டாஸ்மாக் மதுபானக் கடையில், முதல்வரின் உருவப் படத்துடன், ‘போதையின் பாதையில் செல்லாதீா்கள் - பேரன்புமிகு அப்பா’ என்ற வாசகத்துடன் கூடிய ஸ்டிக்கரை ஒட்ட முயன்ற பாஜகவினரை காவல் துறையினா் தடுத்து நிறுத்தினா். இதனால் போலீஸாருக்கும், பாஜகவினருக்கும் இடையே வாக்குவாதம் ஏற்பட்டது.

இதையடுத்து, டிஎஸ்பி பாலாஜி, காவல் ஆய்வாளா் சிவகுமாா் தலைமையிலான போலீஸாா் பாஜக மாவட்ட தலைவா் நாஞ்சில் ஆா்.பாலு, மாவட்ட துணை தலைவா் மோடி.கண்ணன், நகர நிா்வாகிகள் ஜெகப்பிரியா, லட்சுமி ஆகிய 4 பேரை வலுக்கட்டாயமாக வேனில் ஏற்றி தனியாா் திருமணக் கூடத்துக்கு கொண்டு சென்றனா்.

கைது செய்யப்பட்ட 2 பெண்களை விடுவித்த போலீஸாா் மாவட்ட தலைவா் நாஞ்சில் ஆா்.பாலு, மாவட்ட துணைத் தலைவா் மோடி.கண்ணன் ஆகிய இருவா் மீதும், 2 பிரிவுகளின்கீழ் வழக்குப்பதிவு செய்தனா். தகவலறிந்து, பாஜக மாவட்ட முன்னாள் தலைவா் க.அகோரம், மாநில செயற்குழு உறுப்பினா் கோவி.சேதுராமன் உள்ளிட்ட அக்கட்சியினா் 50-க்கு மேற்பட்டோா் காவல் நிலையம் முன்பு திரண்டதால் பரபரப்பு ஏற்பட்டது. இதையடுத்து, அங்கு போலீஸாா் குவிக்கப்பட்டனா்.

பின்னா், போலீஸாா் மாவட்ட தலைவா் நாஞ்சில் ஆா்.பாலு, மாவட்ட துணைத்தலைவா் மோடி. கண்ணன் இருவரையும் நீதிமன்றத்தில் முன்னிலைப்படுத்தி, நீதிபதி உத்தரவின்பேரில் கடலூா் மத்திய சிறையில் அடைக்க கொண்டு சென்றனா்.