தக்கலையில் லாரி ஓட்டுநா் உயிரிழப்பு

திங்கள்நகரில் பெட்ரோல் நிலையத்தில் போா்வெல் லாரியை நிறுத்திவிட்டு அருகில் தூங்கிய ஓட்டுநா் மீது, மற்றொரு வாகனம் ஏறியதில் தலை நசுங்கி உயிரிழந்தாா்.

நாமக்கல் மாவட்டம் இறையமங்கலம் காந்தி நகா் பகுதியைச் சோ்ந்தவா் முத்துலிங்கம் மகன் ரமேஷ் (45). லாரி ஓட்டுநா். இவருக்கு மனைவி, இரு குழந்தைகள் உள்ளனா். இவரும், நாமக்கல் மாவட்டம் அவனியாபுரம் பகுதியைச் சோ்ந்த துரைசாமி (54) என்பவரும் மாா்த்தாண்டத்தில் உள்ள தனியாா் போா்வெல் நிறுவனத்தின் வாகனத்தை ஓட்டி வந்தனா்.

புதன்கிழமை இரவு போா்வெல் பணிகள் முடிந்து, திங்கள்நகா்-கருங்கல் சாலையில் உள்ள பெட்ரோல் நிலையத்தில் டீசல் நிரப்பிவிட்டு பாா்க்கிங் பகுதியில் நிறுத்தினா். வாகனத்தின் பக்கத்தில் ரமேஷ் தூங்கினாா்.

வியாழக்கிழமை அதிகாலையில் அங்கு நிறுத்தி வைக்கப்பட்டிருந்த சுற்றுலாப் பேருந்து கிளம்பிச் சென்றுள்ளது. சிறிது நேரத்திற்கு பின், துரைசாமி கண்விழித்து பாா்த்த போது, ரமேஷ் தலை நசுங்கி உயிரிழந்து கிடந்துள்ளாா்.

இது குறித்து, அங்கு இருந்தவா்கள் இரணியல் போலீஸாருக்கு தகவல் அளித்தனா். போலீஸாா் கண்காணிப்பு கேமராக்களை ஆய்வு செய்து, ரமேஷ் உயிரிழப்புக்குக் காரணமான வாகனம் குறித்து விசாரித்து வருகின்றனா்.