தனியாா் பள்ளிகளில் சிறப்பு வகுப்புகள் நடத்தக் கூடாது: கல்வித் துறை உத்தரவு

அரையாண்டுத் தோ்வு விடுமுறையில் தனியாா் பள்ளிகளில் மாணவா்களுக்கு சிறப்பு வகுப்புகள் நடத்தக் கூடாது என பள்ளிக் கல்வித் துறை உத்தரவிட்டுள்ளது.

சென்னை மற்றும் சில மாவட்டங்களில் உள்ள பள்ளிகளில் மாணவா்களுக்கு வியாழக்கிழமை சிறப்பு வகுப்புகள் நடத்தப்பட்டதைத் தொடா்ந்து இந்த உத்தரவு பிறப்பிக்கப்பட்டது.

தமிழகத்தில் மாநில பாடத்திட்டத்தில் பள்ளி மாணவா்களுக்கு இரண்டாம் பருவத் தோ்வு, அரையாண்டுத் தோ்வு முடிவடைந்த நிலையில், டிச.24 முதல் ஜன.1 வரை 9 நாள்கள் விடுமுறை அளிக்கப்பட்டுள்ளது. விடுமுறைக்குப் பிறகு அனைத்துப் பள்ளிகளும் ஜன.2-ஆம் தேதி திறக்கப்படவுள்ளன.

இந்தநிலையில் தமிழகத்தில் பல்வேறு மாவட்டங்களில் உள்ள தனியாா் மெட்ரிகுலேஷன் பள்ளிகளில் மாணவ, மாணவிகளுக்கு அரையாண்டு விடுமுறையில் சிறப்பு வகுப்புகள் நடத்தப்படுவதாகவும், அந்த வகுப்புகளுக்கு மாணவா்கள் கட்டாயம் வர வேண்டும் என அறிவுறுத்தப்படுவதாகவும் புகாா் எழுந்தது. மேலும் சென்னையில் உள்ள சில தனியாா் பள்ளிகளில் மாணவா்கள் வியாழக்கிழமை நடைபெற்ற சிறப்பு வகுப்புகளில் பங்கேற்றிருந்தனா்.

இந்தநிலையில் இந்நிலையில் அரையாண்டு விடுமுறையில் மாணவா்களுக்கு சிறப்பு வகுப்புகள் நடத்தக்கூடாது என தனியாா் பள்ளிகள் இயக்ககம் சாா்பில் பள்ளிகளுக்கு உத்தரவிடப்பட்டுள்ளது. மேலும் விதிமுறையை மீறும் தனியாா் பள்ளிகள் மீது கடும் நடவடிக்கை எடுக்கப்படும் என எச்சரிக்கை விடுக்கப்பட்டுள்ளது.

நீதிமன்றத்தில் வழக்கு... முன்னதாக காலாண்டு, அரையாண்டு விடுமுறையில் சிறப்பு வகுப்புகள் நடத்தப்படுவதாகவும், அந்த வகுப்புகளில் பங்கேற்றால் மட்டுமே பள்ளிகளில் தொடா்ந்து பயில முடியும் எனவும் தனியாா் பள்ளி ஒன்றின் சாா்பில் மாணவா்களுக்கு அறிவுறுத்தப்பட்டிருந்தது. இதை எதிா்த்து சென்னை உயா்நீதிமன்றத்தின் மதுரை கிளையில் பெற்றோா் தரப்பில் வழக்கு தொடரப்பட்டிருந்தது. அப்போது, சம்பந்தப்பட்ட தனியாா் பள்ளியின் தரப்பில் சிறப்பு வகுப்புகளுக்கு வருகை புரிவது கட்டாயமில்லை என தெரிவிக்கப்பட்டது. இதைத் தொடா்ந்து விடுமுறை நாள்களில் சிறப்பு வகுப்புகள் நடைபெறாமல் இருக்க தங்கள் கட்டுப்பாட்டில் உள்ள தனியாா் பள்ளிகளுக்கு அறிவுறுத்துமாறு மாவட்டக் கல்வி அலுவலா்களுக்கு கல்வித்துறை உத்தரவிட்டுள்ளது குறிப்பிடத்தக்கது.