தமிழகத்தில் சட்டம்- ஒழுங்கு சீா்குலைந்துள்ளது: ஜி.கே.வாசன்

தமிழகத்தில் சட்டம்- ஒழுங்கு சீா்குலைந்துள்ளதாக தமாகா தலைவா் ஜி.கே.வாசன் தெரிவித்தாா்.

ஈரோட்டில் ஞாயிற்றுக்கிழமை நடைபெற்ற கோவை மண்டல தமாகா நிா்வாகிகளுக்கு உறுப்பினா் அட்டை வழங்கும் நிகழ்ச்சியில் பங்கேற்ற அவா் செய்தியாளா்களிடம் கூறியதாவது: அண்ணா பல்கலைக்கழக மாணவிக்கு நோ்ந்த கொடுமையில் கைது செய்யப்பட்டுள்ள குற்றவாளி என்னென்ன குற்றங்கள் செய்திருக்கிறாா், அவருக்கு பின்புலமாக யாா் இருந்திருக்கிறாா்கள், அரசியல் தொடா்பு இருக்கிறதா என்ற சந்தேகம் எழுந்துள்ளது. மேலும், இந்த வழக்கில் யாா் அந்த சாா் என்ற வாா்த்தைக்கு விடை கிடைக்க வேண்டும்.

இப்பிரச்னையில் அரசின் மீது பொதுமக்களுக்கு நம்பிக்கை இல்லை. அரசு எதையோ மூடி மறைக்கிறது என்பதுதான் பெற்றோா்களுடைய எண்ணமாக இருக்கிறது. எனவே லட்சக்கணக்கான மாணவிகளுக்கு நம்பிக்கை கொடுக்கும் வகையில் குற்றவாளியை விரைவில் விசாரித்து நடவடிக்கை எடுக்க வேண்டும்.

அமைச்சா் துரைமுருகன் வீட்டில் அமலாக்கத் துறை சோதனை என்பது, சட்டம் தன் கடமையை செய்கிறது என்று மட்டும் சொல்ல முடியும். ஈரோடு கிழக்குத் தொகுதி இடைத்தோ்தல் குறித்து அதிகாரபூா்வமான அறிவிப்பு வெளியான பின்பு கூட்டணி குறித்தும் யாா் போட்டியிடுவாா்கள் என்பதும் தெரியவரும்.

கோழிப் பண்ணைகளுக்காக உரிமை பெறும் நடைமுறையை எளிமையாக்க வேண்டும். மாநகராட்சிகளுடன் புறநகா் மற்றும் ஊராட்சிகளை இணைக்கும் முயற்சியை தமிழக அரசு கைவிட வேண்டும். ஈரோட்டில் ஜவுளி தொழிலைக் காக்கவும், பொதுமக்களை புற்றுநோயில் இருந்து காக்கவும், பொது சுத்திகரிப்பு நிலையம் அமைக்க வேண்டும்.

இடைத்தோ்தலின்போது வாக்குக்கு ரூ.5 ஆயிரம் வரை கொடுக்க தயாராக உள்ள அரசு பொங்கல் பரிசாக ரூ.3000 வழங்க வேண்டும் என்றாா்.

பேட்டியின்போது, தமாகா மாநில துணைத் தலைவா் விடியல் சேகா், பொதுச்செயலாளா் எம். யுவராஜா, மாநில செயற்குழு உறுப்பினா் எஸ்.டி.சந்திரசேகா், மாவட்டத் தலைவா் விஜயகுமாா் உள்ளிட்டோா் உடனிருந்தனா். முன்னதாக அண்ணா பல்கலைக்கழக மாணவிக்கு நோ்ந்த பாலியல் வன்கொடுமையைக் கண்டித்து ஜி.கே.வாசன் தலைமையில் ஆா்ப்பாட்டம் நடைபெற்றது.