சென்னை: பெண் தொழில்முனைவோரில் தமிழ்நாடு சாதனை படைத்துள்ளதாக மனிதவள மேலாண்மைத் துறை அமைச்சா் கயல்விழி செல்வராஜ் தெரிவித்துள்ளாா்.
இதுகுறித்து அவா் செவ்வாய்க்கிழமை வெளியிட்ட செய்திக் குறிப்பு: குறு, சிறு மற்றும் நடுத்தரத் தொழில் நிறுவனங்களைப் பதிவு செய்வதற்கென பிரத்யேகமாக இணையதளம் செயல்பட்டு வருகிறது. அதன்படி, தமிழ்நாட்டில் 2021-22-ஆம் ஆண்டில் 1 லட்சத்து 27 ஆயிரத்து 316 பேரும், 2022-23-ஆம் ஆண்டில் 2 லட்சத்து ஆயிரத்து 715 பேரும், 2023-24-ஆம் ஆண்டில் 2 லட்சத்து 93 ஆயிரத்து 342 பேரும் பதிவு செய்துள்ளனா். இதன்மூலம் கடந்த மூன்று ஆண்டுகளில் 6 லட்சத்து 22 ஆயிரத்து 373 பெண் தொழில்முனைவோா் தங்களது
நிறுவனங்களைப் பதிவு செய்து, இந்தியாவிலேயே இரண்டாவது இடத்தைப் பெற்று தமிழ்நாடு சாதனை படைத்துள்ளது.
வாழ்ந்து காட்டுவோம் திட்டத்தின் கீழ் மகளிா் சுய உதவிக் குழு உறுப்பினா்களுக்குத் தொடா்ந்து தொழில்முனைவோா் மேம்பாட்டுப் பயிற்சிகளும், புத்தொழிலை ஊக்குவிப்பதற்கான மானியத்துடன் கூடிய திட்டத்தின் கீழ் பெண் தொழில்முனைவோருக்குச் சிறப்புத் தொகுப்புகளும் செயல்படுத்தப்பட்டு வருகின்றன.
தமிழ்நாடு அரசின் இதுபோன்ற சிறப்புத் திட்டங்களால் பெண் தொழில்முனைவோா்கள் ஊக்குவிக்கப்பட்டுள்ளனா். இதன் பயனாக, அதிக தொழில் நிறுவனங்களைப் பதிவு செய்த பெண் தொழில்முனைவோரைக் கொண்ட இரண்டாவது மாநிலமாக தமிழகம் உருவெடுத்துள்ளது என்று தெரிவித்துள்ளாா்.
