ஓமலூா்: தருமபுரி, கிருஷ்ணகிரி மாவட்ட வெள்ள பாதிப்புகளை பாா்வையிட தமிழக துணை முதல்வா் உதயநிதி ஸ்டாலின் விமானம் மூலம் திங்கள்கிழமை சேலத்துக்கு வருகை தந்தாா்.
தருமபுரி, கிருஷ்ணகிரி மாவட்டங்களில் மழை வெள்ள பாதிப்புகளை பாா்வையிட்டு பாதிக்கப்பட்ட மக்களுக்கு உதவிகள் செய்வதற்காக தமிழக துணை முதல்வா் உதயநிதி ஸ்டாலின் பயணிகள் விமானத்தில் சேலம் வந்தாா். அவா் வந்த போது மழை பெய்ததால், விமானம் இறங்க சிக்னல் கிடைக்காமல் வானத்தில் 6 முறை சுற்றியது. பின்னா் மழை நின்றதும், சிக்னல் கிடைத்ததைத் தொடா்ந்து 40 நிமிட தாமதத்துக்கு பிறகு விமானம் தரை இறங்கியது.
மழை காரணமாக அவரை அழைத்து வர விமான நிலையத்துக்கு உள்ளேயே காா் அனுப்பப்பட்டது. ஆனால், மழை ஓய்ந்த நிலையில் விமானத்தில் இருந்து இறங்கிய துணை முதல்வா், காரை தவிா்த்து நடந்து விமான நிலையத்துக்கு வந்தாா். வெளியே வந்த அவருக்கு சுற்றுலாத் துறை அமைச்சா் ராஜேந்திரன் தலைமையில் 3 மாவட்ட திமுக நிா்வாகிகள் வரவேற்றனா். சேலம் மாவட்ட நிா்வாகத்தின் சாா்பிலும் வரவேற்பு அளிக்கப்பட்டது.
தொடா்ந்து காா் மூலம் தருமபுரிக்கு விரைந்து சென்றாா். அவருடன் அமைச்சா் ராஜேந்திரன், துணை முதல்வரின் செயலாளா் பிரதீப் யாதவ் ஆகியோா் சென்றனா்.
