தலைநகரில் பரவலாக மழை; காற்றின் தரத்தில் பின்னடைவு!

தேசியத் தலைநகா் தில்லியில் செவ்வாய்க்கிழமை மேகமூட்டமான சூழல் நிலவியது. காற்றின் தரத்தில் பின்னடைவு ஏற்பட்டிருந்தது.

கடந்த வாரத் தொடக்கத்தில் இருந்து வானம் மேகமூட்டத்துடன் இருந்து வருகிறது. தென்மேற்குப் பருவ மழையின் தாக்கம் காரணமாக அவ்வப்போது மழையும் பெய்து வருகிறது. இந்நிலையில், வானிலை ஆய்வு மையம் கணித்திருந்த படி அதிகாலை வேளையில் நகரத்தில் பரவலாக மழை பெய்தது. ஆனால், அதன் பிறகு வானம் மேகமூட்டமாக இருந்தாலும் மாலை வரையிலும் மழை ஏதும் பதிவாகவில்லை.

நகரத்தில் காலை 8.30 மணியுடன் முடிவடைந்த கடந்த 24 மணி நேரத்தில் சஃப்தா்ஜங் வானிலை கண்காணிப்பு நிலையத்தில் 19 மி.மீ. மழை பதிவாகியிருந்தது. இதேபோன்று நஜஃப்கரில் 11.5 மி.மீ., ஆயாநகரில் 12.2 மி.மீ., லோதி ரோடில் 19.8 மி.மீ., பாலத்தில் 17 மி.மீ., ரிட்ஜில் 33 மி.மீ., பிரகதி மைதானில் 17.8 மி.மீ., பூசாவில் 55 மி.மீ., ராஜ்காட்டில் 17.8 மி.மீ., சல்வான் பப்ளிக்ஸ்கூல் பகுதியில் 53.5 மி.மீ. மழை பதிவாயிருந்தது.

வெப்பநிலை: இந்நிலையில், தில்லியின் முதன்மை வானிலை நிலையமான சஃப்தா்ஜங்கில் செவ்வாய்க்கிழமை காலையில் குறைந்தபட்ச வெப்பநிலை இயல்பை விட3.6 டிகிரி குறைந்து 23.4 டிகிரி செல்சியஸாக பதிவாகியது. அதிகபட்ச வெப்பநிலை இயல்பை விட 0.4 டிகிரி குறைந்து 33.8 டிகிரி செல்சியஸாக பதிவாகியது. காற்றில் ஈரப்பதத்தின் அளவு காலை 8.30 மணியளவில் 98 சதவீதமாகவும், மாலை 5.30 மணியளவில் 68 சதவீதமாகவும் இருந்ததாக வானிலை ஆய்வு மையம் தெரிவித்துள்ளது. மேலும், மற்ற வானிலை கண்காணிப்பு நிலையங்களிலும் அதிகபட்ச வெப்பநிலை சற்று குறைந்தே பதிவாகியிருந்தது.

காற்றின் தரம்: இதற்கிடையே, தில்லியில் கடந்த சில நாள்களாக திருப்தி பிரிவில் நீடித்து வந்த காற்றின் தரம் செவ்வாய்க்கிழமை சற்று பின்னடைவைச் சந்தித்தது. காலையில் ஒட்டுமொத்தக் காற்றுத் தரக் குறியீடு 101புள்ளிகளாகப் பதிவாகி ‘மிதமான’ பிரிவில் இருந்ததாக மத்திய மாசுக் கட்டுப்பாட்டு வாரிய புள்ளி விவரத் தகவல்கள் மூலம் தெரிய வந்தது.

இதன்படி, பூசா, சாந்தினி சௌக், துவாரகா செக்டாா் 8, ஓக்லா பேஸ் 2 ஆகிய வானிலை கண்காணிப்பு நிலையங்களில் காற்றுத் தரக் குறியீடு 100 முதல் 200 புள்ளிகளுக்கிடையே பதிவாகி மிதமான பிரிவில் இருந்தது. அதே சமயம், குருகிராம், ஆயாநகா், நொய்டா செக்டாா் 125, டாக்டா் கா்னி சிங் துப்பாக்கி சுடும் தளம், ஸ்ரீஅரபிந்தோ மாா்க், மதுரா ரோடு, நேரு நகா், ஸ்ரீஃபோா்ட், ஜவாஹா்லால் நேரு ஸ்டேடியம், தில்லி விமான நிலையம், ஆா்.கே.புரம், மேஜா் தயான் சந்த் நேஷனல் ஸ்டேடியம், லோதி ரோடு, மந்திா் மாா்க், தில்லி பல்கலை. வடக்கு வளாகம், பூசா ஆகிய நிலையங்களில் காற்றுத் தரக் குறியீடு 100 புள்ளிகளுக்கு கீழே பதிவாகி திருப்தி பிரிவில் இருந்தது,.

முன்னறிவிப்பு: இந்நிலையில், புதன்கிழமை (ஆக.13) அன்று இடியுடன் கூடிய மழைக்கு வாய்ப்பு இருப்பதாக வானிலை ஆய்வு மையம் கணித்துள்ளது. மேலும், குறைந்தசபட்ச வெப்பநிலை 24 டிகிரி செல்சியஸாகவும், அதிகபட்ச வெப்பநிலை 34 டிகிரி செல்சியஸாகவும் இருக்கும் என்றும் தெரிவித்துள்ளது.