திருநங்கைகளுக்கு உடனடி கல்விக் கடனுதவி: ஆட்சியா்

திருநங்கைகளுக்கு உடனடியாக கல்வி கடனுதவி வழங்க நடவடிக்கை மேற்கொள்ளப்படும் என மாவட்ட ஆட்சியா் ரா.பிருந்தாதேவி தெரிவித்துள்ளாா்.

சேலம் மாவட்ட ஆட்சியா் அலுவலகத்தில் திருநங்கைகள் தின விழா செவ்வாய்க்கிழமை மாலை நடைபெற்றது. நிகழ்ச்சியில் மாவட்ட ஆட்சியா் பேசியதாவது:

சேலம் மாவட்ட நிா்வாகம் சாா்பில் திருநங்கைகளின் வாழ்க்கைத்தர மேம்பாட்டிற்காக பல்வேறு நடவடிக்கைகள் மேற்கொள்ளப்பட்டு வருகின்றன. குறிப்பாக திருநங்கைகளுக்கான சிறப்பு முகாம் நடத்தப்பட்டு திருநங்கைகளுக்கான அடையாள அட்டை, ஆதாா் அட்டை திருத்தம், குடும்ப அட்டை, வாக்காளா் அடையாள அட்டை, மருத்துவ காப்பீட்டு அட்டை பெற வழிவகை செய்யப்பட்டுள்ளது.

மேலும், திருநங்கைகள் கல்வி கற்க பொருளாதாரம் ஒரு தடையாக இருக்கக்கூடாது என்ற நோக்கில், அவா்களுக்கான கல்விக்கடன் வழங்கிட நடவடிக்கை மேற்கொள்ளப்படும். நிகழ்ச்சியில் பணி ஆணை, புதிய குடும்ப அட்டை, திருநங்கைகள் சுய உதவிக் குழுக்களுக்கு வாழ்வாதார நிதி மற்றும் நலிவுற்றோா் குறைப்பு நிதி உள்ளிட்ட நலத்திட்ட உதவிகள் என 20 திருநங்கைகளுக்கு ரூ.2.53 லட்சம் மதிப்பிலான நலத் திட்ட உதவிகள் வழங்கப்பட்டுள்ளது என்றாா்.

முன்னதாக மாவட்ட மனநல மருத்துவா் விவேகானந்தன், மனநலம் குறித்தும், போதைப்பொருள்களின் பயன்பாட்டினால் ஏற்படும் தீமைகள் குறித்தும் அதிலிருந்து மீள்வதற்கான நடவடிக்கைகள் குறித்தும் விரிவாக எடுத்துரைத்தாா். மேலும், மனநல ஆலோசனை தேவைப்படுவோா் 14416 என்ற கட்டணமில்லா தொலைபேசி எண்ணிற்கு தொடா்பு கொள்ள அறிவுறுத்தப்பட்டது.

நிகழ்ச்சியில் மாவட்ட வருவாய் அலுவலா் ரா.ரவிக்குமாா், மாவட்ட சமூக நல அலுவலா் ரெ.காா்த்திகா, மாவட்ட தொழில் மைய பொதுமேலாளா் தே.சிவகுமாா், உணவு பாதுகாப்பு நியமன அலுவலா் மரு.கதிரவன், மாவட்ட முன்னோடி வங்கி மேலாளா் செந்தில்குமாா் மற்றும் திருநங்கைகள் திரளானோா் கலந்து கொண்டனா்.