திருவள்ளூா் மாவட்டத்தில் கூட்டுறவு சங்கங்கள் மற்றும் தொழில்முனைவோா் மூலம் 33 முதல்வா் மருந்தகங்கள் தொடங்க தயாராக உள்ளதாகவும், வரும் 24-ஆம் தேதி முதல் பயன்பாட்டுக்குக் கொண்டு வரப்பட உள்ளதாகவும் ஆட்சியா் மு.பிரதாப் தெரிவித்தாா்.
திருவள்ளூா் மாவட்டத்தில் ஏழை, எளிய மக்கள் பயன்பெறும் வகையில், அனைத்து மருந்துகளும் ஒரே இடத்தில் கிடைக்கும் நோக்கத்தில் முதல்வா் மருந்தகங்கள் தொடங்க அரசு உத்தரவிட்டது. அதன்பேரில், இந்த மாவட்டத்தில் கூட்டுறவு சங்கங்களின் மூலம் 18 மருந்தகங்களும், தொழில்முனைவோா் மூலம் 15 மருந்தகங்களும் தொடங்க நடவடிக்கை எடுக்கப்பட்டுள்ளன. அந்த வகையில், திருவள்ளூா் வி.எம்.நகரில் கூட்டுறவு சங்கம் மூலம் புதிதாக தொடங்கி செயல்பட உள்ள மருந்தகத்தில் முன்னேற்பாடு பணிகள் தொடா்பாக ஆட்சியா் மு.பிரதாப் வெள்ளிக்கிழமை ஆய்வு மேற்கொண்டாா். அப்போது அந்த மருந்தகத்தில் இடம் பெற்றுள்ள மருந்துகள் குறித்து ஒவ்வொன்றாக பாா்வையிட்டு ஆய்வு செய்தாா்.
பின்னா், இது தொடா்பாக அவா் கூறியதாவது: இந்த மருந்தகங்களில் ஜெனிரிக் மருந்துகள், சா்ஜிக்கல்ஸ், சித்தா, ஆயுா்வேதம், யுனானி மற்றும் பிற மருந்துகளையும் குறைந்த விலையில் பொதுமக்களுக்கு கிடைக்கச் செய்யும் நோக்கமாகக் கொண்டு, மாநில அளவில் முதல் கட்டமாக 1,000 முதல்வா் மருந்தகங்கள் வரும் 24-ஆம் தேதி முதல்வா் மு.க.ஸ்டாலின் தொடங்கி வைக்க உள்ளாா். அதன்பேரில், திருவள்ளூா் மாவட்டத்தில் பல்வேறு இடங்களில் கூட்டுறவுச் சங்கங்கள் மற்றும் தொழில்முனைவோா் மூலமாகவும் முதல்வா் மருந்தகங்கள் அமைக்கப்பட்டு, மாவட்ட மருந்து சேமிப்பு கிடங்கிலிருந்து மருந்துகள் அனுப்பும் பணி நடைபெற்று வருகிறது.
அந்த வகையில், அனைத்து பிறவகை மருந்துகளும், பிற வகையிலான மருந்துகளும் கிடைக்க வழிவகை செய்யப்பட்டுள்ளது.
இந்த மருந்துகள் 25 சதவீதம் வரை தள்ளுபடி விலையில் விற்பனை செய்யப்பட உள்ளன. இதற்காக கூட்டுறவு சங்கங்களின் மூலம் 18 முதல்வா் மருந்தகங்களும், தொழில்முனைவோா் மூலம் 15 முதல்வா் மருந்தகங்களும் என 33 முதல்வா் மருந்தகங்கள் உள்கட்டமைப்பு வசதிகளுடன், மருந்தக உரிமம் பெறப்பட்டு, தயாா் நிலையில் உள்ளதாக அவா் தெரிவித்தாா்.
அப்போது, திருவள்ளூா் மாவட்ட கூட்டுறவு சங்கங்களின் இணைப் பதிவாளா் சண்முகவள்ளி, துணைப் பதிவாளா் சீனிவாசன், வட்டாட்சியா் ரஜினிகாந்த் மற்றும் அரசு அலுவலா்கள் உள்ளிட்டோா் உடனிருந்தனா்.
