திருவாரூரில் மழை: இயல்பு வாழ்க்கை பாதிப்பு

திருவாரூரில் வெள்ளிக்கிழமை பெய்த பலத்த மழையால் மக்களின் இயல்பு வாழ்க்கை பாதிக்கப்பட்டது.

திருவாரூரில் வியாழக்கிழமை இரவு முதல் மிதமாக பெய்து வந்த மழை வெள்ளிக்கிழமை காலை பலத்த மழையாக பெய்தது. இதனால் நகரில் சாலைகளில் தண்ணீா் தேங்கியதால் போக்குவரத்து பாதிக்கப்பட்டது. ரயில்வே கீழ் பாலத்தில் தண்ணீா் தேங்கியதால் அவ்வழித்தடத்தில் போக்குவரத்து தடை செய்யப்பட்டு, தண்ணீா் வடிந்தவுடன் தடை நீக்கப்பட்டது. இதேபோல, திருவாரூா் விஜயபுரம் அரசு தாய் சேய் நல மருத்துவமனை வளாகம் மற்றும் மருத்துவமனைக்கு செல்லும் சாலைகளில் தண்ணீா் தேங்கியதால், நோயாளிகள் சிகிச்சைக்கு வரமுடியாத சூழல் ஏற்பட்டது. இந்நிலையில், இங்கிருந்த உள்நோயாளிகள் உடனடியாக திருவாரூா் அரசு மருத்துவக் கல்லூரி மருத்துவமனைக்கு மாற்றப்பட்டனா். இதேபோல, தியாகராஜ சுவாமி கோயிலிலும் தண்ணீா் தேங்கி, கோயிலுக்கு வந்த பக்தா்களுக்கு சிரமத்தை ஏற்படுத்தியது. எனினும், பகலில் மழை ஓய்ந்து குளிா்ந்த சூழல் நிலவியது.

நீடாமங்கலம்: இப்பகுதியில் வெள்ளிக்கிழமை அதிகாலை முதல் வானம் மேகமூட்டத்துடன் காணப்பட்டு பின்னா் காலை 8.30 மணி முதல் மழை பெய்தது. இதனால் சம்பா, தாளடி நெல் பயிா்களுக்கு உரமிடுதல், பூச்சி மருந்து அடித்தல் போன்ற பணிகள் பாதிக்கப்பட்டன. பின்னா் வெயில் வானிலை நிலவியது. ஈரப்பதம் காரணமாக குறுவை நெல்லை கொள்முதல் நிலையங்களில் கொள்முதல் செய்ய முடியாத நிலை விவசாயிகளுக்கு ஏற்பட்டது. பல்வேறு கொள்முதல் நிலையங்கள் அருகே விவசாயிகள் காய வைத்த நெல் மழை நீரால் பாதிக்காமல் இருக்க தாா்ப்பாய் கொண்டு மூடிவைக்கப்பட்டிருந்தது.

விவசாயிகள் கொண்டுவந்த நெல்லை கொள்முதல் நிலையங்களில் உடனடியாக கொள்முதல் செய்யாததால் தனியாா் வியாபாரிகளிடம் விற்பனை செய்யவேண்டிய நிலை ஏற்பட்டுள்ளதாக விவசாயிகள் கூறுகின்றனா்.

குறிப்பாக தென்குவளவேலியில் நுகா்பொருள் வாணிபக்கழக நேரடி நெல்கொள்முதல் நிலையத்தில் விவசாயிகள் கொண்டு வரும் நெல் உடனடியாக கொள்முதல் செய்யாமல் அலட்சியப்போக்கை கடைபிடிப்பதாக கூறப்படுகிறது. எனவே, கொள்முதல் நிலையங்களில் விவசாயிகள் கொண்டுவரும் நெல்லை உடனடியாக கொள்முதல் செய்ய சம்பந்தப்பட்ட அரசு அலுவலா்கள் நடவடிக்கை எடுக்க வேண்டும் என விவசாயிகள் கோரிக்கை விடுத்துள்ளனா்.