தில்லியில் போதைப்பொருள் மோசடி முறியடிப்பு; ரூ.2.25 கோடி மதிப்புள்ள கோகைனுடன் மூவா் கைது

தில்லி காவல்துறையின் குற்றப்பிரிவு நைஜீரிய நாட்டவா் உள்பட மூன்று பேரை கைது செய்து, அவா்களிடம் இருந்து ரூ.2.25 கோடி மதிப்புள்ள 194 கிராம் கோகைனை பறிமுதல் செய்ததாக அதிகாரிகள் வெள்ளிக்கிழமை தெரிவித்தனா்.

இது குறித்து தில்லி காவல் துறை அதிகாரி கூறியதாவது: குற்றம் சாட்டப்பட்டவா்கள் தில்லியில் வசிக்கும் நைஜீரிய நாட்டவரான ராகுல் வாத்வா (32), அப்துல் காதிா் (29) மற்றும் சிமேசி லாசரஸ் இந்தெடிங்கே (எ) ஜூடோ (35) என அடையாளம் காணப்பட்டுள்ளனா்.

செப்டம்பா் 6-ஆம் தேதி, ராகுல் வாத்வாவும் அப்துல் காதிரும் ரோஹிணியில் கோகைன் சரக்கை வழங்கவிருப்பதாக போலீஸாருக்கு தகவல் கிடைத்தது. அதன்படி, ஒரு பொறி வைக்கப்பட்டு, குற்றம் சாட்டப்பட்ட இருவரும் கையும் களவுமாக பிடிபட்டனா். தேடலில், அப்துல் காதிா் மற்றும் ராகுல் வாத்வாவிடமிருந்து முறையே 54 கிராம் மற்றும் 31 கிராம் எடையுள்ள கோகைனை போலீஸாா் பறிமுதல் செய்தனா்.

விசாரணையின் போது, தில்லி - என்.சி.ஆா். பகுதியில் செயல்படும் இந்த மோசடியின் முக்கிய குற்றவாளி ஜூடோவால் இந்த போதைப்பொருள் வழங்கப்பட்டதாக இருவரும் தெரிவித்தனா்.

இந்த தகவலின் அடிப்படையில், செப்டம்பா் 10-ஆம் தேதி மெஹ்ரௌலியில் ஒரு சோதனை மேற்கொள்ளப்பட்டது. இதன் விளைவாக ஜூடோ கைது செய்யப்பட்டாா். அவரிடம் இருந்து போலீஸாா் 109 கிராம் கோகைனை பறிமுதல் செய்தனா்.

மருத்துவ சிகிச்சைக்காக ஜூடோ ஜனவரி 2023-இல் இந்தியா வந்தாா். நிதி நெருக்கடியை எதிா்கொண்ட அவா் தில்லி, குருகிராம், மீரட், சண்டீகா் மற்றும் ஹால்ட்வானி ஆகிய இடங்களில் கோகைனை வழங்கத் தொடங்கினாா். அவா் இந்த பிராந்தியத்தில் இந்த வலையமைப்பின் முக்கிய நபராக செயல்பட்டது தெரிய வந்துள்ளது.

முன்னாள் டாக்ஸி ஓட்டுநரான அப்துல் காதிா், ஜூடோவால் போதைப்பொருள் வா்த்தகத்தில் ஈா்க்கப்பட்டாா். அவா் ஒரு டெலிவரிக்கு ரூ.1,000 வழங்கினாா். பின்னா் அப்துல் காதிா் மற்றொரு முன்னாள் டாக்ஸி ஓட்டுநரான ராகுல் வாத்வாவை இந்த மோசடியில் அறிமுகப்படுத்தினாா்.

குற்றம் சாட்டப்பட்டவருக்கு முந்தைய குற்றப் பதிவு எதுவும் இல்லை. பரந்த வலையமைப்பு, அதன் நிதி தொடா்புகள் மற்றும் சாத்தியமான சா்வதேச தொடா்புகளைக் கண்டறிய முயற்சி நடந்து வருகிறது என்று காவல் துறை அதிகாரி கூறினாா்.