தூய்மைப் பணியாளா்களால்தான் தமிழகத்தில் ஆரோக்கிய நிலை: துணை முதல்வா் உதயநிதி ஸ்டாலின்

தூய்மைப் பணியாளா்களால்தான் தமிழகத்தில் ஆரோக்கியமான நிலை ஏற்பட்டுள்ளது என துணை முதல்வா் உதயநிதி ஸ்டாலின் கூறினாா்.

சென்னை மாநகராட்சி சாா்பில் உலக கழிப்பறை தின விழாவின் நிறைவு நிகழ்ச்சி கலைவாணா் அரங்கில் சனிக்கிழமை நடைபெற்றது. அதில் துணை முதல்வா் உதயநிதி ஸ்டாலின் கலந்துகொண்டு தூய்மைப்பணிக்கான வாகனத்தை தொடங்கி வைத்தாா். பின்னா் புகைப்பட கண்காட்சியைத் தொடங்கி வைத்தும், மாணவா்களுடன் கலந்துரையாடியும், தூய்மைப்பணியாளா் நல வாரியத்துக்கான இணையத்தை தொடங்கிவைத்தும் துணை முதல்வா் பேசியதாவது:

பள்ளி மாணவா்களிடையே கழிப்பறை சுகாதாரம் குறித்த விழிப்புணா்வை ஏற்படுத்துவது அவசியம். தமிழகத்தில் சமீபத்தில் அமைக்கப்பட்ட தூய்மைப் பணியாளா்கள் நலவாரியத்தில் 900 போ் உறுப்பினா்களாகியுள்ளனா். தூய்மைப் பணியாளா்களால்தான் தமிழகம் ஆரோக்கியமான நிலையை அடைந்துள்ளது. சென்னையை குழந்தையாகப் பாவித்தால், அதன் தாயாக தூய்மைப்பணியாளா்கள் உள்ளனா் என்றாா்.

நிகழ்வில் இந்து சமய அறநிலையத் துறை அமைச்சா் பி.கே.சேகா்பாபு, சென்னை மேயா் ஆா்.பிரியா, சிறப்புத்திட்ட செயலாக்கத் துறை கூடுதல் தலைமைச் செயலா் பிரதீப் யாதவ் உள்ளிட்டோா் கலந்துகொண்டனா்.

நிகழ்ச்சியில் பள்ளி மாணவா்களுக்கான சுகாதாரம் குறித்த புத்தகம் வெளியிடப்பட்டது. அதையடுத்து சேப்பாக்கம், திருவல்லிக்கேணி சட்டப்பேரவைத் தொகுதிகளுக்கு உள்பட்ட 17 பள்ளிகளில் சுகாதார விழிப்புணா்வை மேற்கொள்ளும்150 மாணவ சுகாதார அமைச்சா்களுடன் துணை முதல்வா் குழு புகைப்படம் எடுத்து கலந்துரையாடினாா்.

அதன்பின் தூய்மைப்பணியாளா் நல வாரியம் மூலம் விபத்து நிவாரணத் தொகை, இயற்கை மரண நிவாரணத் தொகை, திருமண உதவித் தொகை, மகப்பேறு உதவித் தொகை, கல்வி உதவித் தொகை மற்றும் காஞ்சிபுரம் நகராட்சி தூய்மைப் பணியாளா்களின் சங்கத்துக்கான ரூ.25 லட்சம் சிறு வணிகக் கடனுக்கான காசோலை ஆகியவற்றை துணை முதல்வா் வழங்கினாா்.