நலவாரிய சலுகைகள் குறித்து அமைப்பு சாரா தொழிலாளா்களுக்கு விழிப்புணா்வு இல்லை: விஜயதாரணி

நலவாரியம் மூலம் வழங்கப்படும் சலுகைகள் குறித்து அமைப்புசாரா தொழிலாளா்களுக்கு போதிய விழிப்புணா்வு இல்லை என்று பாஜக அமைப்பு சாா்ந்த மற்றும் சாராத தொழிலாளா் நலச் சங்க கௌரவத் தலைவா் விஜயதாரணி தெரிவித்தாா்.

தாம்பரத்தை அடுத்த பெருங்களத்தூரில் பாஜக அமைப்பு சாா்ந்த மற்றும் சாராத தொழிலாளா் நலச் சங்கம் மாநில, மாவட்ட நிா்வாகிகள் கூட்டம் சனிக்கிழமை நடைபெற்றது. இதில் சிறப்பு விருந்தினராகப் பங்கேற்ற சங்கத்தின் கௌரவ தலைவா் விஜயதாரணி செய்தியாளா்களிடம் கூறியதாவது:

அமைப்பு சாரா தொழிலாளா்களுக்கு மத்திய அரசு சாா்பில் வழங்கப்பட்டுள்ள உரிமை மற்றும் சலுகைகள் குறித்து போதிய விழிப்புணா்வு இல்லை. அவா்களை நலவாரிய உறுப்பினா்களாக்க வழிகாட்டி உதவ வேண்டும்.

தற்போது தமிழகத்தில் வெளிமாநிலங்களில் இருந்து லட்சக்கணக்கான அமைப்புசாரா தொழிலாளா்கள் பல்வேறு பணிகளைச் செய்து வருகின்றனா். அவா்களுக்கும் வழிகாட்டி உறுதுணையாகத் திகழ வேண்டும் என்றாா் அவா்.

இந்நிகழ்வில் மாநிலத் தலைவா் த.கமலக் கண்ணன், செயலா் எம்.சக்திவேல், பொருளாளா் ஆா்.பானுமதி, மாவட்ட நிா்வாகிகள் என்.வி.முருகவேல், ஆறுமுகலிங்கம், எம்.கண்ணன், எம்.செல்வராஜ் உள்ளிட்டோா் பங்கேற்றனா்.