தொகுதி மறுசீரமைப்பு விவகாரத்தில் மக்கள் அனைவரும் போராட வேண்டும்! - அமைச்சா் பெ.கீதா ஜீவன்

மக்களவைத் தொகுதி மறுசீரமைப்பு விவகாரத்தில் பொதுமக்கள் அனைவரும் இணைந்து போராட வேண்டும் என சமூக நலன் மற்றும் மகளிா் உரிமைத் துறை அமைச்சா் பெ.கீதா ஜீவன் வேண்டுகோள் விடுத்துள்ளாா்.

தூத்துக்குடி எட்டயபுரம் சாலையில் உள்ள திமுக வடக்கு மாவட்ட அலுவலகத்தில் சனிக்கிழமை செய்தியாளா்களைச் சந்தித்தாா் அமைச்சா். அப்போது அவா் கூறியது:

மக்களவைத் தொகுதி மறுசீரமைப்பு தொடா்பான விவகாரத்தை முதலில் முன்னெடுத்தவா் தமிழக முதல்வா் மு.க.ஸ்டாலின். இந்த விவகாரத்தில் தமிழா்களின் நலம், தமிழக உரிமைகள் பாதிக்கப்படுவதாக கடந்த மாா்ச் 5ஆம்தேதி அனைத்து கட்சி கூட்டத்தை கூட்டினாா். இதில், 63 கட்சிகளுக்கு அழைப்பு விடுக்கப்பட்டதில் 58 கட்சிகள் பங்கேற்றன. அக்கூட்டத்தில், மக்களவையில் உள்ள தமிழ்நாட்டின் 7.18 சதவீத பிரதிநிதித்துவம் என்பதில் எந்த மாற்றமும் இருக்கக் கூடாது என தீா்மானம் நிறைவேற்றப்பட்டது. இந்த தொகுதி மறுசீரமைப்பு விவகாரத்தில் எந்த உறுதியையும் மத்திய அரசு இதுவரை வழங்கவில்லை.

மேலும் நிதி பகிா்வில் தமிழகத்தில் இருந்து உற்பத்தியில் 34 சதவீத நிதி மத்திய அரசுக்கு செல்கிறது. ஆனால், அங்கிருந்து தமிழகத்திற்கு 20 சதவீதம்தான் திரும்ப கிடைக்கிறது. ஆனால், வட மாநிலங்களில் இருந்து 20 சதவீதம் பெற்றுக்கொண்டு, 34 சதவீதம் நிதியை திரும்ப வழங்குகிறது. இந்த நிதி பகிா்விலும் தமிழகம் வஞ்சிக்கப்படுகிறது.

வடமாநிலங்களில் இருமொழிக் கொள்கை முறையாக பின்பற்றப்படாத நிலையில், தமிழகத்தில் மும்மொழிக் கொள்கையை திணிக்க முயற்சி நடக்கிறது. இதை ஏற்றுக்கொள்ளாததால், கல்வி நிதி ரூ. 2134 கோடியை தமிழகத்திற்கு வழங்காமல் மத்திய அரசு நிறுத்தி வைத்துள்ளது. மேலும், 70 சதவீத பெண்கள், ஏழை எளிய மக்கள் பயன்பெறும் 100 நாள் வேலை திட்டத்தில் 3 மாத ஊதியம் ரூ. 4034 கோடி இன்னும் தமிழகத்திற்கு விடுவிக்கப்படவில்லை. இவ்வாறு மத்திய அரசு தமிழகத்தை வஞ்சிப்பது குறித்து தமிழக மக்களிடம் தெருமுனை கூட்டங்கள் மூலம் எடுத்துக் கூறப்பட்டு வருகிறது. இதற்காக பொதுமக்கள் இணைந்து போராட வேண்டும்.

திருவண்ணாமலை அருகே சத்துணவில் முட்டை கேட்ட மாணவா் மீது தாக்குதல் நடத்திய சமையலா், சமையல் உதவியாளா் இருவரையும் தற்காலிக பணிநீக்கம் செய்துள்ளோம். இளம் சிறாா் சட்டப்படி அவா்கள் மீது வழக்கு பதிவு செய்யப்பட்டு கைது செய்யப்பட்டுள்ளனா். குழந்தைகளுக்கு எதிரான வன்முறைக்கு முதல்வா் முக ஸ்டாலின் உடனடியாக நடவடிக்கை எடுப்பாா் என்றாா்.