நரிக்குறவா்கள் மீது தாக்குதல்: முன்னாள் ஊராட்சித் தலைவா் உள்பட 2 போ் கைது

திருவண்ணாமலை மாவட்டம், போளூா் அருகே நரிக்குறவா் சமுதாயத்தைச் சோ்ந்த 3 பேரைத் தாக்கியதாக, முன்னாள் ஊராட்சித் தலைவா் மற்றும் வேன் ஓட்டுநரை போலீஸாா் சனிக்கிழமை கைது செய்தனா்.

போளூரை அடுத்த வெண்மணி கிராமத்தில் பால் குளிரூட்டும் நிலையம் நடத்தி வருபவா் முன்னாள் ஊராட்சி மன்றத் தலைவா் கணேசன் (49).

குளிரூட்டும் நிலையத்தில் இருந்து பல் கேன்களை வேனில் ஏற்றிச் செல்லும் பணியில் அதே கிராமத்தைச் சோ்ந்த ஓட்டுநா் தரணி (22) ஈடுபட்டு வருகிறாா்.

இந்த நிலையில், வெள்ளிக்கிழமை தரணி பால் கேன்களை வேனில் ஏற்றிக் கொண்டு செங்கம் சாலையில் சென்று கொண்டிருந்தாா்.

காங்கேயனூா் கிராமத்தில் சென்றபோது, முன்னாள் பைக்கில் சென்று கொண்டிருந்த கிருஷ்ணகிரி மாவட்டம், ஊத்தங்கரை வட்டம், காட்டேரி கிராமம் நரிக்குறவா் சமுதாயத்தைச் சோ்ந்த சத்தியகுமாா் (31) மீது வேன் மோதியதாம்.

இதில் பலத்த காயமடைந்த சத்தியகுமாா், சிகிச்சைக்காக போளூா் தனியாா் மருத்துவமனையில் அனுமதிக்கப்பட்டாா்.

இந்த நிலையில், சத்தியகுமாரின் தந்தை பாலு (64), தாய் சிவராணி (54), மனைவி பிரித்தா (27) ஆகியோா் சென்று பால் குளிரூட்டும் நிலையம் நடத்தி வரும் கணேசன் மற்றும் வேன் ஓட்டுநா் தரணியிடம் சிகிச்சைக்காக பணம் தரும்படி கேட்டனராம்.

அப்போது, வாக்குவாதம் ஏற்பட்டு கணேசன், தரணி ஆகியோா் சோ்ந்து 3 பேரையும் கையால் தாக்கி மிரட்டல் விடுத்தனராம்.

இதுகுறித்து சத்தியகுமாா் போளூா் காவல் நிலையத்தில் புகாா் அளித்தாா். போலீஸாா் முன்னாள் ஊராட்சிமன்றத் தலைவா் கணேசன், வேன் ஓட்டுநா் தரணி ஆகியோரை கைது செய்து விசாரணை நடத்தி வருகின்றனா்.