சின்னர் அசத்தல்: 3ஆவது முறையாக டேவிஸ் கோப்பையை வென்ற இத்தாலி!
சீா்காழி அருகே தென்னலக்குடி பகுதியில் நான்குவழிச் சாலை விரிவாக்கப் பணியில், சுரங்கப் பாதை அமைக்க கிராம மக்கள் எதிா்ப்பு தெரிவித்து வரும் நிலையில், அப்பகுதியில் எம்பி ஆா். சுதா வியாழக்கிழமை நேரில் ஆய்வு செய்தாா்.
விழுப்புரம் முதல் நாகை வரை நான்கு வழிச்சாலை அமைக்கப்பட்டு வருகிறது. இதன் ஒருபகுதியாக தென்னலக்குடி- வைத்தீஸ்வரன் கோவில் பிரதான சாலை துண்டிக்கப்பட்டு, சிறிய அளவில் சுரங்கப்பாதை அமைப்பதற்கான பணிகள் நடைபெற்று வருகின்றன.
இதற்கு அப்பகுதி மக்கள் எதிா்ப்பு தெரிவித்து, பேருந்துகள், அறுவடை இயந்திரங்கள், லாரி உள்ளிட்ட கனரக வாகனங்கள் செல்லும் வகையில் மேம்பாலம் அமைத்து தர கோரிக்கை விடுத்து வருகின்றனா்.
இக்கோரிக்கையை வலியுறுத்தி, கடந்த சில தினங்களுக்கு முன்பு நான்குவழிச் சாலைப் பணியை தடுத்து நிறுத்தினா்.
இந்நிலையில், மயிலாடுதுறை எம்பி ஆா். சுதா இப்பகுதியை ஆய்வு செய்தாா். அப்போது, பொதுமக்களுக்கு இடையூறு ஏற்படாத வகையில் சாலை அமைக்க அலுவலா்களிடம் வலியுறுத்தினாா்.
ஆய்வின்போது, இப்பணியின் திட்ட இயக்குநா் சக்திவேல், திட்ட ஆலோசகா் ஜெகதீசன், பொறியாளா் ஜெகதீஷ் உள்ளிட்டோா் உடனிருந்தனா்.
