நாமக்கல் புதிய பேருந்து நிலைய சந்திப்பில் பூட்டியே காணப்படும் புறக்காவல் நிலையம்!

நாமக்கல் புதிய பேருந்து நிலையம் செல்லும் பகுதியில், அண்மையில் திறக்கப்பட்ட புறக்காவல் நிலையம் பூட்டியவாறே காணப்படுகிறது.

நாமக்கல்லில் புதிய பேருந்து நிலையம் நவ. 10 முதல் செயல்பட்டு வருகிறது. நகரப் பேருந்துகள் இயங்கும் வகையில் பழைய பேருந்து நிலையம் செயல்படுகிறது. அனைத்துப் பேருந்துகளும் புதிய பேருந்து நிலையத்துக்கு வந்து மற்ற பகுதிகளுக்கு செல்கின்றன.

நாள்தோறும் ஆயிரக்கணக்கான மக்கள் வந்து செல்லும் புதிய பேருந்து நிலையம் உள்ள முதலைப்பட்டி புதூா் நான்கு சாலை சந்திப்பு பகுதியில், பயணிகள் பாதுகாப்பு கருதி புறக்காவல் நிலையம் அமைக்கும் நடவடிக்கையை காவல் துறை மேற்கொண்டது. அகில இந்திய கட்டுநா் சங்கம் சாா்பில் புறக்காவல் நிலையம் அமைத்து கொடுக்கப்பட்டது. மேலும், முக்கிய இடங்களில் ஒன்பது கண்காணிப்பு கேமராக்களும் பொருத்தப்பட்டன. கூடுதலாக 50 கேமராக்கள் வைப்பதற்கான நடவடிக்கை எடுக்கப்படும் என சங்க நிா்வாகிகள் தெரிவித்தனா்.

மாவட்ட காவல் கண்காணிப்பாளா் ச.ராஜேஷ் கண்ணனால் பொங்கல் பண்டிகைக்கு முன்னா் திறக்கப்பட்ட இந்த புறக்காவல் நிலையத்தில் கண்காணிப்பு கேமரா பதிவுகளை ஆய்வு செய்வதற்கான கருவிகள் பொருத்தப்பட்டுள்ளன. நல்லிபாளையம் காவல் நிலையக் கட்டுப்பாட்டில் உள்ள இந்த புறக்காவல் நிலையமானது, திறப்பு விழாவுக்கு பிறகு செயல்படவே இல்லை.

சேலம், ஈரோடு, திருச்சி, கரூா் பகுதிகளில் இருந்து வருவோா் புதிய பேருந்து நிலையம் செல்லும் முன் புறக்காவல் நிலைய பகுதிகளில் இறங்கி மாற்றுப் பேருந்தில் தாங்கள் செல்ல வேண்டிய இடங்களுக்கு பயணித்து வருகின்றனா்.

புறக்காவல் நிலையத்தில் போலீஸாா் யாரும் இல்லாததால், இரவு நேரங்களில் பேருந்து ஏற காத்திருக்கும் பெண் பயணிகள் அச்சமடைகின்றனா். காவல் துறை தரப்பிலோ, போதிய அளவில் போலீஸாா் எண்ணிக்கை இல்லாததால் தற்காலிகமாக மூடப்பட்டுள்ளது. விரைவில் உதவி ஆய்வாளா் தலைமையில் புறக்காவல் நிலையம் செயல்படும் என்கின்றனா்.