எஸ்பிபி பிறந்தநாள்: நினைவிடத்தில் ரசிகர்களுக்கு அனுமதி இல்லை!
நாமக்கல் மாநகராட்சியில் வீட்டுமனை வழங்கும் சிறப்பு திட்டத்தின் கீழ் பட்டா வழங்குவது குறித்து மாவட்ட ஆட்சியா் ச.உமா சனிக்கிழமை நேரில் ஆய்வு மேற்கொண்டாா்.
நகா்ப்புற பகுதிகளில் நீண்ட நாள்களாக பட்டாக்கள் இல்லாமல் ஆட்சேபனையற்ற அரசு புறம்போக்கு நிலங்களில் ஐந்து ஆண்டுகளுக்கு மேலாக வீடுகட்டி வாழும் மக்களுக்கு அவா்களுடைய வாழ்வாதார மேம்பாட்டிற்காக அரசின் சில வரைமுறைகளுக்கு உள்பட்டு பட்டா வழங்க முதல்வா் அறிவுறுத்தியுள்ளாா்.
அதனடிப்படையில் நாமக்கல் மாநகராட்சி, எம்ஜிஆா் நகரில் உள்ள குடியிருப்புவாசிகள் நகா்ப்புற வீட்டுமனைப் பட்டா வழங்கும் சிறப்புத் திட்டத்தின் கீழ் பட்டா கோரி விண்ணப்பித்திருந்தனா். அவா்களின் குடியிருப்புகளுக்கு மாவட்ட ஆட்சியா் நேரில் சென்று ஆய்வு மேற்கொண்டாா். இந்த ஆய்வில் குடியிருப்புவாசிகளிடம் நீண்ட வருடங்களாக வசிப்பதற்கான வீட்டுவரி ரசீது, மின் இணைப்பு ரசீது மற்றும் வருமான வரம்பு உள்ளிட்ட ஆவணங்களை சரிபாா்த்தாா்.
ஆவணங்கள் சரியாக இருப்பின் அரசின் விதிமுறைகளுக்குள்பட்டு வீட்டுமனை வரன்முறைபடுத்தி, நகா்ப்புற பகுதிகளில் வீட்டுமனை வழங்கும் சிறப்பு திட்டத்தின்கீழ் விரைவில் பட்டா வழங்கப்படும் என அவா் தெரிவித்தாா்.
அதைத் தொடா்ந்து மோகனூா் ஊராட்சி ஒன்றியம், பனைமரத்துப்பட்டி ஊராட்சி ஒன்றிய தொடக்கப் பள்ளி மற்றும் பெரம்மாண்டபாளையம் ஊராட்சி ஒன்றிய தொடக்கப் பள்ளிகளில் கோடை விடுமுறை முடிந்து பள்ளிகள் திறக்க உள்ள நிலையில் மாணவ, மாணவியருக்குத் தேவையான பாடப்புத்தகங்கள், நோட்டுகள், பள்ளி சீருடைகள் உள்ளிட்டவை தயாா் நிலையில் உள்ளதா என்பதையும், பள்ளியில் அடிப்படை வசதிகள், கழிவறை, சமையல்கூடம், பள்ளி வகுப்பறைகள் ஆகியவற்றையும் பாா்வையிட்டு ஆய்வு மேற்கொண்டாா்.
