நிவாரண முகாம்களில் தங்கவைக்கப்பட்டோருக்கு உதவி

கனமழை எச்சரிக்கையைத் தொடா்ந்து உதகையில் முன்னெச்சரிக்கை நடவடிக்கையாக முகாம்களில் தங்கவைக்கப்பட்டுள்ள மக்களுக்கு தமிழ் வளா்ச்சி மற்றும் செய்தித் துறை அமைச்சா் மு.பெ சாமிநாதன் நிவாரணப் பொருள்களை செவ்வாய்க்கிழமை வழங்கினாா்.

நீலகிரி மாவட்டத்தில் கனமழை பெய்யும் என வானிலை ஆய்வு மையம் எச்சரிக்கை விடுதிருந்த நிலையில், உதகை, குன்னூா், கோத்தகிரி உள்பட மாவட்டம் முழுவதும் 80 போ் கொண்ட மாநில பேரிடா் மீட்புக் குழுவினா் கண்காணிப்பு பணியில் ஈடுபட்டுள்ளனா்,

கனமழை காரணமாக உதகை நொண்டிமேடு பகுதியில் வீடு இடிந்து ஒருவா் உயிரிழந்த நிலையில், முன்னெச்சரிக்கையாக அப்பகுதி மக்கள் தலையாட்டுமந்து நகராட்சிப் பள்ளியில் அமைக்கப்பட்ட முகாமில் தங்கவைக்கப்பட்டுள்ளனா்.

இந்நிலையில், முகாமில் தங்கவைக்கப்பட்ட மக்களை அமைச்சா் மு.பெ.சாமிநாதன், அரசு தலைமை கொறடா கா.ராமசந்திரன் ஆகியோா் நேரில் சந்தித்து அவா்களுக்காக அமைக்கப்பட்டுள்ள சிறப்பு மருத்துவ முகாம்களை பாா்வையிட்டனா். பின்னா், அவா்களுக்கு கம்பளிகள் மற்றும் நிவாரணப் பொருள்களை வழங்கினாா்.

இதைத் தொடா்ந்து, அமைச்சா் மு.பெ.சாமிநாதன் செய்தியாளா்களிடம் கூறியதாவது: உதகை, குன்னூா், கோத்தகிரி ஆகிய பகுதிகளில் 143 போ் முகாம்களில் தங்கவைக்கப்பட்டுள்ளனா்.

நீலகிரி மாவட்டத்தில் மழையின் தாக்கம் படிப்படியாக குறைந்து வருகிறது. மாவட்ட நிா்வாகம் முன்னெச்சரிக்கை நடவடிக்கையாக பல்வேறு பணிகளை மேற்கொண்டதால் பெரிய அளவு சேதங்கள் ஏற்படவில்லை என்றாா்.

நீலகிரி மாவட்டத்தில் அபாயகரமான நிலையில் உள்ள யூகலிப்டஸ் மரங்கள் படிப்படியாக அகற்றப்படும் என அரசு தலைமை கொறடா கா. கா.ராமசந்திரன் தெரிவித்தாா்.

இந்நிகழ்ச்சியில், நீலகிரி மாவட்ட ஆட்சியா் லட்சுமி பவ்யா தன்னேரு உள்ளிட்ட அரசுத் துறை அதிகாரிகள் பலா் கலந்து கொண்டனா்.