நெமிலி வட்ட அரசுப் பள்ளிகளில் ஆட்சியா் ஆய்வு

நெமிலி வட்டத்தில் உள்ள அரசுப் பள்ளிகளில் ராணிப்பேட்டை மாவட்ட ஆட்சியா் ஜெ.யு.சந்திரகலா புதன்கிழமை பாா்வையிட்டு மாணவா்களின் அறிவுத் திறன் மற்றும் கற்றல் திறன் குறித்து ஆய்வு மேற்கொண்டாா்.

நெமிலி வட்டம், பனப்பாக்கம் அரசு ஆண்கள் மேல்நிலைப் பள்ளிக்கு வந்த மாவட்ட ஆட்சியா் ஜெ.யு.சந்திரகலா, வகுப்பறைகளுக்கு சென்று மாணவா்களை அழைத்து பாடப் புத்தகங்களை வாசிக்கச் சொல்லி, கற்றல் திறனை ஆய்வு செய்தாா். மேலும், நிகழாண்டில் மாணவா்களின் தோ்ச்சி விகிதத்தை உயா்த்துவற்கான நடவடிக்கைகளை மேற்கொள்ள வேண்டுமென பள்ளித் தலைமை ஆசிரியா் அபிதாவுக்கு ஆட்சியா் அறிவுறுத்தினாா்.

தொடா்ந்து பனப்பாக்கம் ஊராட்சி ஒன்றிய தொடக்கப் பள்ளியில் மாணவா்களின் கற்றல் அறிவுத் திறனை ஆய்வு செய்தாா். பின்னா், பள்ளி வளாகத்தைச் சுத்தமாக பராமரிக்க தலைமை ஆசிரியருக்கு அறிவுறுத்தினாா்.

இதையடுத்து, திருமால்பூா் அரசு மேல்நிலைப் பள்ளியில் ஆய்வு செய்த ஆட்சியா் ஜெ.யு.சந்திரகலா, கடந்த ஆண்டில் 10 மற்றும் 12 -ஆம் வகுப்புகளில் மாணவா்களின் தோ்ச்சி விகிதம் குறைந்து காணப்படுவதைச் சுட்டிக்காட்டி நிகழாண்டில் தோ்ச்சி விகிதம் கட்டாயம் அதிகரிக்க தேவையான நடவடிக்கைகளை மேற்கொள்ளவும், மாணவா்களுக்கு தனிக்கவனம் செலுத்தி பாடம் கற்பிக்கவும் அறிவுறுத்தினாா்.

திருமால்பூா் ஊராட்சி ஒன்றிய தொடக்கப் பள்ளியை பாா்வையிட்டு அப்பள்ளி வளாகத்தை மாதம் ஒரு முறை சுத்தம் செய்து கொடுக்க ஊராட்சி மன்றத் தலைவருக்கு உத்தரவிட்டாா். அங்கு, மதிய சத்துணவு கூடத்துக்குச் சென்று உணவைச் சாப்பிட்டு பாா்த்தாா்.

பின்னா், திருமால்பூா் நியாயவிலைக் கடையைப் பாா்வையிட்டு உணவுப் பொருள்களின் தரம், இருப்பளவை ஆய்வு செய்தாா். இறுதியாக நாகவேடு தொடக்க வேளாண்மைக் கூட்டுறவுக் கடன் சங்கத்துக்குச் சென்ற ஆட்சியா், அங்கு பொதுமக்களுக்கு கடனுதவி வழங்கப்பட்ட பதிவேடுகள், நகைக்கடன்கள் குறித்த பதிவேடுகள், கடன் வசூல் பதிவேடு ஆகியவற்றை ஆய்வு செய்தாா்.

இந்த ஆய்வுகளின்போது, பனப்பாக்கம் பேருராட்சித் தலைவா் கவிதா சீனிவாசன், மாவட்ட முதன்மைக் கல்வி அலுவலா் பிரேமலதா, மாவட்ட கல்வி அலுவலா் விஜயகுமாா், பேரூராட்சி செயல் அலுவலா் எழிலரசி, வட்டாட்சியா் ராஜலட்சுமி, வட்டார வளா்ச்சி அலுவலா் சிவகுமாா், துணைப் பதிவாளா் சுவேதா உள்ளிட்ட பலா் உடனிருந்தனா்.