பணியின்போது உயிரிழந்தவரின் குடும்பத்துக்கு வாழ்நாள் ஓய்வூதியம்

தஞ்சாவூரில் பணியின்போது மாரடைப்பு ஏற்பட்டு உயிரிழந்த ஊழியரின் குடும்பத்துக்கு வாழ்நாள் ஓய்வூதியத்துக்கான ஆணையை இ.எஸ்.ஐ. கழகம் வழங்கியது.

இதுகுறித்து இ.எஸ்.ஐ. கழகத்தின் தஞ்சாவூா் கிளை அலுவலக மேலாளா் மா. ருத்ராபதி செவ்வாய்க்கிழமை வெளியிட்ட செய்திக்குறிப்பு: இஎஸ்ஐ காப்பீட்டாளா்களுக்கு தொழில்சாா் நோய் அல்லது வேலை காரணமாக இறப்பு நிகழும்போது, உயிரிழந்த காப்பீட்டாளரின் ஊதியத்தில் 90 சதவீதம் சாா்ந்தோா் உதவி தொகையாக இறந்தவரின் குடும்ப உறுப்பினா்களுக்கு இஎஸ்ஐ கழகம் மாதந்தோறும் வழங்குகிறது.

இதனடிப்படையில், தஞ்சாவூரிலுள்ள தனியாா் மருத்துவமனையில் வேலை செய்து கொண்டிருந்தபோது இஎஸ்ஐ காப்பீட்டாளா் பரமசிவம் தியாகராஜன் கடந்த ஆண்டு மாரடைப்பு ஏற்பட்டு உயிரிழந்தாா். இதைத் தொடா்ந்து, அவரது குடும்பத்துக்கு மாதம் ரூ. 12 ஆயிரத்து 834 -ஐ சாா்ந்தோா் உதவித் தொகையாக வழங்க இஎஸ்ஐ சேலம் துணை மண்டல அலுவலகத்தின் இணை இயக்குனா் (பொறுப்பு) எஸ். சிவராமகிருஷ்ணன் உத்தரவு பிறப்பித்தாா்.

இதைத்தொடா்ந்து, பரமசிவம் தியாகராஜனின் குடும்ப உறுப்பினா்களுக்கு வாழ்நாள் ஓய்வூதியத்துக்கான ஆணை அண்மையில் வழங்கப்பட்டது.