பண்ணாரி அம்மன் கோயில் குண்டம் திருவிழா இன்று தொடக்கம்

பண்ணாரிஅம்மன் கோயில் குண்டம் விழா செவ்வாய்க்கிழமை (ஏப்ரல் 8) நடைபெற உள்ளது.

ஈரோடு மாவட்டம், சத்தியமங்கலத்தை அடுத்துள்ள பண்ணாரியில் பிரசித்தி பெற்ற மாரியம்மன் கோயில் உள்ளது. இக்கோயில் குண்டம் விழா பூச்சாட்டலுடன் கடந்த மாா்ச் 24- ஆம் தேதி தொடங்கியது.

இதையடுத்து, சுவாமிக்கு நாள்தோறும் சிறப்பு பூஜைகள், சுவாமி திருவீதி உலா ஆகியவை நடைபெற்று வந்தன. இந்நிலையில், திங்கள்கிழமை சிறப்பு பூஜைகள் செய்து, பக்தா்கள் வழங்கிய எரிக்கரும்புகள் கொண்டு தீ வாா்க்கப்பட்டது.

முக்கிய நிகழ்வான குண்டம் விழா செவ்வாய்க்கிழமை அதிகாலை 3.30 மணியளவில் தொடங்க உள்ளது. குண்டம் இறங்கி தங்களது நோ்த்திக் கடனை செலுத்த ஏராளமான மக்கள் திங்கள்கிழமை காலை முதலே கோயிலில் குவியத் தொடங்கினா்.

பக்தா்களுக்கு தங்குவதற்கும், அவா்களுக்குத் தேவையான அடிப்படை வசதிகளும் கோயில் நிா்வாகம் சாா்பில் செய்யப்பட்டுள்ளன. விழாவையொட்டி, ஏராளமான போலீஸாா் பாதுகாப்புப் பணியில் ஈடுபட்டுள்ளனா்.