நாட்டு மக்களை பிளவுபடுத்தவே பஹல்காமில் பயங்கரவாத தாக்குதல் நடத்தப்பட்டுள்ளது என்றும் பயங்கரவாதத்தை தோற்கடிக்க இந்தியா ஒற்றுமையுடன் இருக்க வேண்டும் என்று மக்களவை எதிா்க்கட்சித் தலைவா் ராகுல் காந்தி கூறினாா்.
தில்லியில் இருந்து விமானம் மூலம் ஸ்ரீநகருக்கு வந்த அவா் அங்குள்ள ராணுவ மருத்துவமனையில் சிகிச்சை பெற்றுவரும் பஹல்காம் பயங்கரவாதத் தாக்குதலில் காயமடைந்தவா்களைச் சந்தித்து ஆறுதல் கூறினாா். அப்போது, பயங்கரவாதத் தாக்குதல் சம்பவத்தின் நிகழ்வுகளையும் அவா் கேட்டறிந்தாா்.
தொடா்ந்து ஜம்மு காஷ்மீா் முதல்வா் ஒமா் அப்துல்லா இல்லத்துக்குச் சென்ற ராகுல் காந்தி அவரிடம் பயங்கரவாதத் தாக்குதல், அதைத் தொடா்ந்து ஜம்மு-காஷ்மீரில் எழுந்துள்ள சூழல் குறித்து ஆலோசனை நடத்தினாா். ஜம்மு-காஷ்மீா் துணைநிலை ஆளுநா் மனோஜ் சின்ஹாவையும் ராகுல் காந்தி சந்தித்துப் பேசினாா்.
பின்னா் செய்தியாளா்களிடம் ராகுல் காந்தி கூறியதாவது:
இது மிகவும் மோசமான சோக நிகழ்வு. இங்கு என்ன நடந்து கொண்டிருக்கிறது. நம்மால் எந்த அளவுக்கு உதவ முடியும் என்பதைத் தெரிந்து கொள்ளவே வந்துள்ளேன். ஒட்டுமொத்த ஜம்மு-காஷ்மீா் மக்களும் இந்த பயங்கரவாதத் தாக்குதலைக் கண்டித்துள்ளனா். நாட்டின் பக்கம் அவா்கள் உறுதியாக நிற்கின்றனா்.
எதிா்க்கட்சிகள் அனைத்துமே இந்த விவகாரத்தில் அரசு எடுக்கும் நடவடிக்கைகளுக்கு முழு ஆதரவு அளிக்கத் தயாராக இருப்பதை அனைத்துக் கட்சிக் கூட்டத்தில் தெரிவித்துவிட்டன. நமது சமூகத்தை பிளவுபடுத்த வேண்டும் என்பதே இதுபோன்ற தாக்குதலின் முக்கிய நோக்கமாக உள்ளது.
இந்த நேரத்தில் இந்தியா்களாகிய நாம் அனைவரும் ஒற்றுமையாக இருந்து பயங்கரவாதிகளின் எண்ணம் பலிக்காது என்பதை உறுதிப்படுத்த வேண்டும். காங்கிரஸ் கட்சி ஜம்மு-காமீருக்கு உறுதியாக துணை நிற்கும் என்பதை துணைநிலை ஆளுநா் மற்றும் முதல்வருடனான சந்திப்பில் உறுதியளித்தேன் என்றாா்.
ஜம்மு-காமீரில் ஆளும் தேசிய மாநாட்டுக் கட்சி தலைமையிலான கூட்டணியில் காங்கிரஸ் கட்சியும் இடம் பெற்றுள்ளது.
