திருப்பூா் மாவட்டம், பல்லடம் அருகே சாலையோரமாக நின்று கொண்டிருந்த லாரி மீது கோழிகளை ஏற்றிச் சென்ற வேன் மோதியதில் இரண்டு போ் சம்பவ இடத்திலேயே திங்கள்கிழமை உயிரிழந்தனா்.
ஆந்திரத்தில் இருந்து மரப்பலகைகளை ஏற்றிக்கொண்டு கேரள மாநிலம், பாலக்காடு நோக்கி ஓட்டுநா் ராஜன் லாரியை ஓட்டிச் சென்றாா். பல்லடம் அருகே கே.கிருஷ்ணாபுரம் பிரிவு என்ற இடத்தில் டீசல் தீா்ந்ததால் சாலையோரமாக லாரியை நிறுத்தியுள்ளாா்.
அப்போது, காங்கயத்தில் இருந்து காமநாயக்கன்பாளையத்தில் உள்ள இறைச்சிக் கடைகளுக்காக கோழிகளை ஏற்றிக்கொண்டு சித்தம்பலம் பகுதியைச் சோ்ந்த ஓட்டுநா் ராஜ்குமாா் வேனில் திங்கள்கிழமை வந்துள்ளாா்.
வாவிபாளையம் ஊராட்சி குள்ளம்பாளையம் பகுதியைச் சோ்ந்த பாபு, புள்ளியப்பம்பாளையத்தைச் சோ்ந்த மேற்பாா்வையாளா் கவியரசன், லோடுமேன் வேல்முருகன், ரவி ஆகியோா் வேனில் பயணித்துள்ளனா்.
சாலையோரமாக நின்று கொண்டிருந்த லாரியை கவனிக்காமல் ஓட்டுநா் ராஜ்குமாா் கோழி வேனை வேகமாக இயக்கியதில் மரப்பலகையோடு நின்று கொண்டிருந்த லாரி மீது வேன் மோதி விபத்துக்குள்ளானது. இதில் வேனில் பயணித்த கவியரசன், பாபு ஆகியோா் சம்பவ இடத்திலேயே உயிரிழந்தனா்.
தகவல் அறிந்து சம்பவ இடத்துக்கு வந்த காமநாயக்கன்பாளையம் போலீஸாா் விபத்துக்குள்ளான லாரியில் கை, கால்கள் முறிந்த நிலையில் சிக்கியிருந்த ஓட்டுநா் ராஜ்குமாரை மீட்டு பல்லடம் அரசு மருத்துவமனைக்கு அனுப்பிவைத்தனா்.
மேலும், உயிரிழந்த இரண்டு பேரின் உடல்களும் உடற்கூறு ஆய்வுக்காக பல்லடம் அரசு மருத்துவமனைக்கு அனுப்பிவைக்கப்பட்டன. இச்சம்பவம் குறித்து காமநாயக்கன்பாளையம் போலீஸாா் விசாரணை மேற்கொண்டுள்ளனா்.
