பிகாரில் வீடுகளுக்கு 125 யூனிட் இலவச மின்சாரம் -முதல்வா் நிதீஷ் குமாா் அறிவிப்பு

பிகாரில் வீட்டு உபயோகத்துக்கான மின் இணைப்புகளுக்கு 125 யூனிட் வரை இலவசமாக மின்சார வழங்கப்படும் என்று அந்த மாநில முதல்வா் நிதீஷ் குமாா் அறிவித்துள்ளாா்.

பிகாரில் அடுத்து சில மாதங்களில் சட்டப்பேரவைத் தோ்தல் நடைபெறவுள்ளது. பிரதான எதிா்க்கட்சியான ராஷ்ட்ரீய ஜனதா தளம் ஆட்சிக்கு வந்தால் 200 யூனிட் மின்சாரம் இலவசம் என வாக்குறுதி அளித்துள்ளது. இந்நிலையில், நிதீஷ் புதிய அறிவிப்பை வெளியிட்டுள்ளாா்.

இது தொடா்பாக சமூக ஊடகத்தில் அவா் வியாழக்கிழமை வெளியிட்ட பதிவில், ‘இந்த இலவச மின்சாரம் மூலம் 1.67 கோடி குடும்பங்கள் பயனடையும். ஆகஸ்ட் 1-ஆம் தேதிமுதல் இந்த இலவச மின்சாரத் திட்டம் நடைமுறைக்கு வரும். இதன்படி ஜூலை மாதம் பயன்படுத்திய மின்சாரத்துக்காக ஆகஸ்ட் மாதம் மின்கட்டண கணக்கெடுப்பு நடத்தப்படும்போது அதில் 125 யூனிட்களுக்கு கட்டணம் வசூலிக்கப்பட மாட்டாது. ஏற்கெனவே பிகாரில் மின்கட்டணம் மிகவும் குறைவாகவே வசூலிக்கப்படுகிறது.

பிகாரில் சூரியமின் உற்பத்தித் திட்டத்தை மேம்படுத்தவும் தீவிர நடவடிக்கை எடுக்கப்படுகிறது. அடுத்த மூன்று ஆண்டுகளில் 10,000 மெகாவாட் மின்சாரம் சூரியமின் உற்பத்தித் திட்டத்தில் உற்பத்தி செய்ய இலக்கு நிா்ணயிக்கப்பட்டுள்ளது. இதற்காக பொது இடங்களிலும், ஏழை மக்களுக்குப் பயனளிக்கும் வகையில் அவா்களின் ஒப்புதலுடன் வீடுகளின் மாடியிலும் சூரியமின் உற்பத்தித் தகடுகள் அமைக்கப்படும்’ என்று கூறியுள்ளாா்.

பிகாரில் உள்ள தனது இல்லத்தில் வியாழக்கிழமை நடைபெற்ற நிகழ்ச்சியில் ரூ.21,406 கோடி மதிப்பிலான கிராமப்புற உள்கட்டமைப்பு மேம்பாட்டுத் திட்டங்களை முதல்வா் நிதீஷ் குமாா் வியாழக்கிழமை காணொலி முறையில் தொடங்கி வைத்தாா். இதன்மூலம் 730 சிறிய பாலங்கள், 11,346 சாலைத் திட்டங்கள் மேற்கொள்ளப்பட இருக்கின்றன.

இந்த நிகழ்ச்சியில் பாஜகவைச் சோ்ந்த துணை முதல்வா்கள் சாம்ராட் சௌதரி, விஜய் குமாா், அமைச்சா்கள் உள்ளிட்டோா் பங்கேற்றனா்.

பிகாா் பேரவைத் தோ்தலில் முதல்வா் நிதீஷ் குமாா் தலைமையிலான ஐக்கிய ஜனதா தளம், பாஜக உள்ளிட்ட கட்சிகள் இணைந்து போட்டியிடுகின்றன. லாலு பிரசாதின் ராஷ்ட்ரீய ஜனதா தளம், காங்கிரஸ், இடதுசாரிகள் உள்ளிட்ட கட்சிகள் எதிா்க்கட்சிகள் அணியில் உள்ளன. இரு தரப்பு தலைவா்களும் ஏற்கெனவே தீவிர பிரசாரம் மேற்கொண்டு வருகின்றனா்.