கடலூா் மாவட்டம், பண்ருட்டி வட்டாரத்தில் பி.எம்.கிசான் நிதியுதவி பெற்று வரும் விவசாயிகள், வேளாண் அடுக்கக திட்டத்தின் கீழ், கிராமங்கள்தோறும் நடத்தப்பட்டு வரும் ஒருங்கிணைந்த தரவுகள் சேகரிப்பு முகாம்களில் பங்கேற்று தங்கள் விவரங்களை இணைத்துக்கொள்ள வேண்டுமென்று பண்ருட்டி வேளாண் உதவி இயக்குநா் பாா்த்தசாரதி தெரிவித்துள்ளாா்.
இதுகுறித்து அவா் வெளியிட்ட செய்திக் குறிப்பு: பண்ருட்டி வட்டாரத்தில் சுமாா் 5,000 விவசாயிகள் தொடா்ச்சியாக பாரத பிரதமரின் கௌரவ நிதி வழங்கும் திட்டத்தின் கீழ், ஆண்டுக்கு ரூ.6,000 நிதியுதவி பெற்று வருகின்றனா். மேற்கண்ட தொகையைப் பெற்று வரும் விவசாயிகள், தற்போது வேளாண், தோட்டக்கலைத் துறை அலுவலா்கள் மற்றும் மகளிா் திட்ட கிராம அளவிலான சமுதாய வள பயிற்றுநா்களால் கிராமங்கள்தோறும் தினசரி காலை 9 மணி முதல் மாலை 6 மணி வரை நடத்தப்பட்டு வரும் முகாம்களில் கலந்துகொண்டு, தங்களது சுய விவரம், நில உடைமை விவரங்களை இணைத்துக்கொள்ள வேண்டும்.
அவ்வாறு இணைத்துக்கொள்ளும் விவசாயிகளுக்கு ஆதாா் எண் போன்று தனித்துவமான அடையாள எண் வழங்கப்பட்டு வருகிறது. இந்த எண்களை பயன்படுத்தி விவசாயிகள் இனிவரும் காலங்களில் மத்திய, மாநில அரசுகளின் அனைத்து திட்டப் பயன்களையும் ஒற்றைச் சாளர முறையில் பெற்றுக்கொள்ளலாம்.
குறிப்பாக, பாரத பிரதமரின் கௌரவ நிதி பெற்று வரும் விவசாயிகள் உடனடியாக முகாம்களில் தங்களது ஆதாா் அட்டை, நிலப் பட்டா, சிட்டா, ஆதாா் எண்ணுடன் இணைக்கப்பட்ட கைப்பேசி எண் ஆகியவற்றை எடுத்துச் சென்று தங்களது விவரங்களை சரி பாா்த்து இணைத்து பயனடைய வேண்டும் எனத் தெரிவித்துள்ளாா்.
