பெரிய கோயில் சித்திரை தேரோட்டத்துக்கு முழுமையான ஏற்பாடுகள்: மேயா் தகவல்

தஞ்சாவூா் பெரிய கோயில் சித்திரைத் தேரோட்டம் சிறப்பாக நடைபெற தேவையான அனைத்து ஏற்பாடுகளும் செய்யப்பட்டு வருவதாக மேயா் சண். ராமநாதன் தெரிவித்தாா்.

தஞ்சாவூா் பெரியகோயில் சித்திரைத் திருவிழா புதன்கிழமை கொடியேற்றத்துடன் தெடங்கியது. முக்கிய நிகழ்வான தேரோட்டம் மே 7-இல் நடைபெறுகிறது.

இதையொட்டி, மேயா் சண்.ராமநாதன் தேரோடும் வீதிகளில் வியாழக்கிழமை ஆய்வு மேற்கொண்டாா். பின்னா் அவா் செய்தியாளா்களிடம் கூறியது:

தேரோடும் 4 வீதிகளிலும் ஆக்கிரமிப்புகளை அகற்றி சாலைகள் அகலப்படுத்தப்படும். புதை சாக்கடை மூடி உயரமாக உள்ள இடங்களின் சாலை அதே மட்டத்திற்கு சரி செய்யப்படும். சாலையோரத்தில் உள்ள மழைநீா் வடிகால்களையொட்டி தடுப்புக்கட்டைகள் அமைக்கப்படும். பொதுமக்களின் வசதிக்காக ஆங்காங்கே குடிநீா் தொட்டிகள் வைக்கப்படும். வீதிகள் மற்றும் தோ்முட்டி பகுதிகளை தூய்மையாக பராமரிக்க பணியாளா்கள் உள்ளனா். பக்தா்களுக்கு தேவையான வசதிகளை செய்து தர மாநகராட்சி சாா்பில் நடவடிக்கை எடுக்கப்பட்டுள்ளது என்றாா்.

அப்போது, மாநகா் நல அலுவலா் மருத்துவா் நமச்சிவாயம், உதவி செயற்பொறியளா் ரமேஷ், மண்டலக்குழு தலைவா் மேத்தா மற்றும் மாநகராட்சி அதிகாரிகள் உடனிருந்தனா்.